dekha kisi ne humse zamane ne kya kiya

dekhā kisī ne ham se zamāne ne kyā kiyā

aur kyā kaheñ ki yaar yagāne ne kyā kiyā

dil chāhtā huuñ aur ko duuñ tere jaur se

kahnā na phir ki ham se fulāne ne kyā kiyā

qātil to us kā har sar-e-mū bāl-pan se thā

ārā.ish us kī zulf ko shāne ne kyā kiyā

dīnār aur diram kī na lā dil ko daam meñ

qārūñ se hai ḳhabar ki ḳhazāne ne kyā kiyā

'hātim' diyā hai shaiḳh ne ab dil sanam ke haath

dīvāna maiñ to thā ye siyāne ne kyā kiyā

dekha kisi ne hum se zamane ne kya kiya

aur kya kahen ki yar yagane ne kya kiya

dil chahta hun aur ko dun tere jaur se

kahna na phir ki hum se fulane ne kya kiya

qatil to us ka har sar-e-mu baal-pan se tha

aaraish us ki zulf ko shane ne kya kiya

dinar aur diram ki na la dil ko dam mein

qarun se hai KHabar ki KHazane ne kya kiya

'hatim' diya hai shaiKH ne ab dil sanam ke hath

diwana main to tha ye siyane ne kya kiya