dekha kuchh aaj yun kisi ghaflat-shiar ne

dekhā kuchh aaj yuuñ kisī ġhaflat-shi.ār ne

maiñ apnī umr-e-rafta ko dauḌā pukārne

hañgāma-e-shabāb kī poñchho na sar-guzasht

apne chaman ko luuT liyā ḳhud bahār ne

paikān-e-tīr zahr meñ itne bujhe na the

kuchh aur kar diyā hai nazar ko ḳhumār ne

tammat-ba-ḳhair dil kī shikāyat kī dāstāñ

hoñToñ ko sī diyā nigah-e-sharmsār ne

himmat paḌī na shaiḳh se kahne kī mohtasib

aa.e ho ik ġharīb pe ġhussa utārne

vo to kaho ki aa.ī qafas tak bhī bū-e-gul

varna bhulā diyā thā hameñ to bahār ne

jo tañg-e-gul the turra-e-dastār ban ga.e

jo gul the aa.e turbat-e-be-kas sañvārne

aa.e ho kyā tumhīñ mujhe āvāz do zarā

āñkhoñ kā nuur chhīn liyā intizār ne

ālām-e-rozgār se 'mullā' ko kyā ġharaz

apnā banā liyā hai use chashm-e-yār ne

dekha kuchh aaj yun kisi ghaflat-shiar ne

main apni umr-e-rafta ko dauDa pukarne

hangama-e-shabab ki ponchho na sar-guzasht

apne chaman ko luT liya KHud bahaar ne

paikan-e-tir zahr mein itne bujhe na the

kuchh aur kar diya hai nazar ko KHumar ne

tammat-ba-KHair dil ki shikayat ki dastan

honTon ko si diya nigah-e-sharmsar ne

himmat paDi na shaiKH se kahne ki mohtasib

aae ho ek gharib pe ghussa utarne

wo to kaho ki aai qafas tak bhi bu-e-gul

warna bhula diya tha hamein to bahaar ne

jo tang-e-gul the turra-e-dastar ban gae

jo gul the aae turbat-e-be-kas sanwarne

aae ho kya tumhin mujhe aawaz do zara

aankhon ka nur chhin liya intizar ne

aalam-e-rozgar se 'mulla' ko kya gharaz

apna bana liya hai use chashm-e-yar ne