dekha na humne rashk se aghyar ki taraf

dekhā na ham ne rashk se aġhyār kī taraf

muñh pher baiThe bazm meñ dīvār kī taraf

sail-e-sarishk apne hī ghar meñ bahā.enge

kyoñ jaa.e ye balā tirī dīvār kī taraf

baiThe biThā.e aa.e jo shāmat to kyā ilaaj

dil ne kahā ki aao chaleñ yaar kī taraf

chāhī thī daad ham ne dil-e-sāf kī magar

ā.īna ho gayā tire ruḳhsār kī taraf

tasvīr ko bhī us kī yahāñ tak ġhurūr hai

dekhe kabhī na tālib-e-dīdār kī taraf

taqsīr mai-farosh kī ai mohtasib nahīñ

ye chiiz uḌ ke jaatī hai mai-ḳhvār kī taraf

dī jaan kis ḳhushī se tah-e-teġh 'dāġh' ne

lab par tabassum aur nazar yaar kī taraf

dekha na hum ne rashk se aghyar ki taraf

munh pher baiThe bazm mein diwar ki taraf

sail-e-sarishk apne hi ghar mein bahaenge

kyon jae ye bala teri diwar ki taraf

baiThe biThae aae jo shamat to kya ilaj

dil ne kaha ki aao chalen yar ki taraf

chahi thi dad hum ne dil-e-saf ki magar

aaina ho gaya tere ruKHsar ki taraf

taswir ko bhi us ki yahan tak ghurur hai

dekhe kabhi na talib-e-didar ki taraf

taqsir mai-farosh ki ai mohtasib nahin

ye chiz uD ke jati hai mai-KHwar ki taraf

di jaan kis KHushi se tah-e-tegh 'dagh' ne

lab par tabassum aur nazar yar ki taraf