dekha na karo KHwab ki ab jagna hoga

dekhā na karo ḳhvāb ki ab jāgnā hogā

ḳhud apnī tabāhī kā sabab sochnā hogā

pardoñ se bahalte hue rahnā nahīñ achchhā

parde se udhar bhī hai koī jhāñknā hogā

thak-hār ke har moḌ pe ḳheme na lagāo

asbāb-e-ḳham-e-rāh-guzar DhūñDnā hogā

ham apne diyoñ ko kabhī bujhne nahīñ deñge

dīvānī havāoñ ko hameñ roknā hogā

patthar to haiñ patthar vo kabhī mom na hoñge

shīshe kā muqaddar hai ise TūTnā hogā

ḳhāmoshī hai achchhī magar itnī nahīñ 'iqbāl'

sannāTe nigal leñge tumheñ bolnā hogā

dekha na karo KHwab ki ab jagna hoga

KHud apni tabahi ka sabab sochna hoga

pardon se bahalte hue rahna nahin achchha

parde se udhar bhi hai koi jhankna hoga

thak-haar ke har moD pe KHeme na lagao

asbab-e-KHam-e-rah-guzar DhunDna hoga

hum apne diyon ko kabhi bujhne nahin denge

diwani hawaon ko hamein rokna hoga

patthar to hain patthar wo kabhi mom na honge

shishe ka muqaddar hai ise TuTna hoga

KHamoshi hai achchhi magar itni nahin 'iqbaal'

sannaTe nigal lenge tumhein bolna hoga