dekhe hain jo gham dil se bhulae nahin jate

dekhe haiñ jo ġham dil se bhulā.e nahīñ jaate

ik 'umr huī yaad ke saa.e nahīñ jaate

ashkoñ se ḳhabar-dār ki āñkhoñ se na nikleñ

gir jaa.eñ ye motī to uThā.e nahīñ jaate

har jumbish-e-dāmān-e-junūñ jān-e-adab hai

is raah meñ ādāb sikhā.e nahīñ jaate

ham bhī shab-e-gesū ke ujāloñ meñ rahe haiñ

kyā kījiye din pher ke laa.e nahīñ jaate

shikva nahīñ samjhā.e koī chāragaroñ ko

kuchh zaḳhm haiñ aise ki dikhā.e nahīñ jaate

ai dast-e-jafā sar haiñ ye arbāb-e-vafā ke

kaT jaa.eñ to kaT jaa.eñ jhukā.e nahīñ jaate

ai 'hosh' ġham-e-dil ke charāġhoñ kī hai kyā baat

ik baar jalā do to bujhā.e nahīñ jaate

dekhe hain jo gham dil se bhulae nahin jate

ek 'umr hui yaad ke sae nahin jate

ashkon se KHabar-dar ki aankhon se na niklen

gir jaen ye moti to uThae nahin jate

har jumbish-e-daman-e-junun jaan-e-adab hai

is rah mein aadab sikhae nahin jate

hum bhi shab-e-gesu ke ujalon mein rahe hain

kya kijiye din pher ke lae nahin jate

shikwa nahin samjhae koi chaaragaron ko

kuchh zaKHm hain aise ki dikhae nahin jate

ai dast-e-jafa sar hain ye arbab-e-wafa ke

kaT jaen to kaT jaen jhukae nahin jate

ai 'hosh' gham-e-dil ke charaghon ki hai kya baat

ek bar jala do to bujhae nahin jate