dekhiye kis ko ras aate hain

dekhiye kis ko raas aate haiñ

achchhe din sab ke paas aate haiñ

ek bhī kaam kā nahīñ hotā

phone din meñ pachās aate haiñ

kal to va.ada bhare gilās kā thā

aaj ḳhālī gilās aate haiñ

tum ko badlāv chāhiye Thahro

ham badal kar libās aate haiñ

pahle bantī hai siitā aprādhī

ba.ad meñ tulsīdās aate haiñ

saarī duniyā se mil-milā kar ham

āḳhirash apne paas aate haiñ

shaam hotī hai tab kahīñ jā kar

vāpas apne havās aate haiñ

jaane kyā ho gayā hai 'nāzim' ko

har jagah vo udaas aate haiñ

dekhiye kis ko ras aate hain

achchhe din sab ke pas aate hain

ek bhi kaam ka nahin hota

phone din mein pachas aate hain

kal to wada bhare gilas ka tha

aaj KHali gilas aate hain

tum ko badlaw chahiye Thahro

hum badal kar libas aate hain

pahle banti hai sita apradhi

baad mein tulsidas aate hain

sari duniya se mil-mila kar hum

aaKHirash apne pas aate hain

sham hoti hai tab kahin ja kar

wapas apne hawas aate hain

jaane kya ho gaya hai 'nazim' ko

har jagah wo udas aate hain