dekhne wale bahaar-e-gulsitan dekha kiye

dekhne vaale bahār-e-gulsitāñ dekhā kiye

aur ham rang-e-adā-e-bāġhbāñ dekhā kiye

kab vo hañs hañs kar mujhe girya-kunāñ dekhā kiye

ijtimā-e-barq-o-bārāñ kā samāñ dekhā kiye

ham qafas meñ bhī ye jaur-e-bāġhbāñ dekhā kiye

qat.a hote apnī shāḳh-e-āshiyāñ dekhā kiye

umr bhar qismat kī ye nairangiyāñ dekhā kiye

yaar ko aġhyār par ham mehrbāñ dekhā kiye

sajda kaisā paas tak pahuñche na az-pās-e-adab

duur se ham un kā sang-e-āstāñ dekhā kiye

un kī āñkheñ chaar hote hī jhukīñ sū-e-zamīn

aur ham hairat se rū-e-āsmāñ dekhā kiye

maiñ umīd-e-lutf meñ mahv-e-jabīñ-sā.ī rahā

vo mirā zauq-e-sujūd-e-āstāñ dekhā kiye

mujh se un kī be-hijābī tak na dekhī jā sakī

aur vo baiThe mirī rusvā.iyāñ dekhā kiye

ishq kī duniyā meñ ai 'kaukab' maiñ huuñ vo māh-rū

rahnumā ḳhud mere qadmoñ ke nishāñ dekhā kiye

dekhne wale bahaar-e-gulsitan dekha kiye

aur hum rang-e-ada-e-baghban dekha kiye

kab wo hans hans kar mujhe girya-kunan dekha kiye

ijtima-e-barq-o-baran ka saman dekha kiye

hum qafas mein bhi ye jaur-e-baghban dekha kiye

qata hote apni shaKH-e-ashiyan dekha kiye

umr bhar qismat ki ye nairangiyan dekha kiye

yar ko aghyar par hum mehrban dekha kiye

sajda kaisa pas tak pahunche na az-pas-e-adab

dur se hum un ka sang-e-astan dekha kiye

un ki aankhen chaar hote hi jhukin su-e-zamin

aur hum hairat se ru-e-asman dekha kiye

main umid-e-lutf mein mahw-e-jabin-sai raha

wo mera zauq-e-sujud-e-astan dekha kiye

mujh se un ki be-hijabi tak na dekhi ja saki

aur wo baiThe meri ruswaiyan dekha kiye

ishq ki duniya mein ai 'kaukab' main hun wo mah-ru

rahnuma KHud mere qadmon ke nishan dekha kiye