dekhne wale ki aankhon ka guman hota hai

dekhne vaale kī āñkhoñ kā gumāñ hotā hai

ret par varna kahāñ āb-e-ravāñ hotā hai

is udāsī meñ tire jism kā nau-ḳhez gulāb

jaise sahrā meñ koī mīThā kuaañ hotā hai

pyaar kā phuul har ik daur meñ taaza hī rahe

ruḳh badaltā bhī hai dariyā to ravāñ hotā hai

baḳht kī niiñd bujhāne kī ghaḌī aatī hai

ḳhvāb kā taḳht ulaTtā hai dhuāñ hotā hai

ba.az auqāt badan oḌh ke Dar jaatā huuñ

mujh ko malbūs meñ bhī terā gumāñ hotā hai

apnī chhāñv meñ mujhe baiThne detā hī nahīñ

peḌ jo bhī mire pahlū meñ javāñ hotā hai

is kā matlab ki yahāñ ġham kī koī qadr nahīñ

jis ko bhī dekho vahī mahv-e-fuġhāñ hotā hai

leT jaatā huuñ rivāyāt kī dīvār ke saath

log kahte haiñ yahāñ ishq javāñ hotā hai

ḳhāmushī chhoḌ ga.ī kaisī namī hoñToñ par

lafz kī aag jalātā huuñ dhuāñ hotā hai

husn har rang meñ tahsīn ke laa.eq hai 'munīr'

peḌ sūkhā ho to ibrat kā nishāñ hotā hai

dekhne wale ki aankhon ka guman hota hai

ret par warna kahan aab-e-rawan hota hai

is udasi mein tere jism ka nau-KHez gulab

jaise sahra mein koi miTha kuan hota hai

pyar ka phul har ek daur mein taza hi rahe

ruKH badalta bhi hai dariya to rawan hota hai

baKHt ki nind bujhane ki ghaDi aati hai

KHwab ka taKHt ulaTta hai dhuan hota hai

baz auqat badan oDh ke Dar jata hun

mujh ko malbus mein bhi tera guman hota hai

apni chhanw mein mujhe baiThne deta hi nahin

peD jo bhi mere pahlu mein jawan hota hai

is ka matlab ki yahan gham ki koi qadr nahin

jis ko bhi dekho wahi mahw-e-fughan hota hai

leT jata hun riwayat ki diwar ke sath

log kahte hain yahan ishq jawan hota hai

KHamushi chhoD gai kaisi nami honTon par

lafz ki aag jalata hun dhuan hota hai

husn har rang mein tahsin ke laeq hai 'munir'

peD sukha ho to ibrat ka nishan hota hai