dekho ki nim-shab ko chaTakti hai KHamushi

dekho ki nīm-shab ko chaTaktī hai ḳhāmushī

chhāoñ meñ chāñdnī kī mahaktī hai ḳhāmushī

dekho ki barq-pāra koī jism par girā

aur vahshat-e-barahna ko Dhaktī hai ḳhāmushī

dekho ki mal ke pairahan-e-soḳhta kī raakh

chingāriyoñ ke saath lapaktī hai ḳhāmushī

dekho ki nok-e-ḳhār pe dahshat ke vāste

bosīda pairahan sī laTaktī hai ḳhāmushī

dekho ki rauzan-e-shab-e-tanhā.ī khol kar

āñkhoñ ke ābshār ko taktī hai ḳhāmushī

dekho ki abr-e-ġham ke masāmoñ ko chiir kar

dīvār-o-dar se aaj Tapaktī hai ḳhāmushī

dekho ki kohsār-e-dil-e-pur-hirās ke

kis darrah-e-fanā meñ kaḌaktī hai ḳhāmushī

dekho ki os vahshat-e-tan par paḌī 'shafaq'

aur ḳhema-e-havā meñ dahaktī hai ḳhāmushī

dekho ki nim-shab ko chaTakti hai KHamushi

chhaon mein chandni ki mahakti hai KHamushi

dekho ki barq-para koi jism par gira

aur wahshat-e-barahna ko Dhakti hai KHamushi

dekho ki mal ke pairahan-e-soKHta ki rakh

chingariyon ke sath lapakti hai KHamushi

dekho ki nok-e-KHar pe dahshat ke waste

bosida pairahan si laTakti hai KHamushi

dekho ki rauzan-e-shab-e-tanhai khol kar

aankhon ke aabshaar ko takti hai KHamushi

dekho ki abr-e-gham ke masamon ko chir kar

diwar-o-dar se aaj Tapakti hai KHamushi

dekho ki kohsar-e-dil-e-pur-hiras ke

kis darrah-e-fana mein kaDakti hai KHamushi

dekho ki os wahshat-e-tan par paDi 'shafaq'

aur KHema-e-hawa mein dahakti hai KHamushi