dekhte hain jab kabhi iman mein nuqsan shaiKH

dekhte haiñ jab kabhī īmān meñ nuqsān shaiḳh

aune-paune bech Daalā karte haiñ īmān shaiḳh

ba.ad muddat ke jahāñ meñ rahzanoñ ke din phire

sunte haiñ phir ho ga.e haiñ ab police kaptān shaiḳh

har zabāñ par zikr-e-haq aur dil meñ hai yād-e-butāñ

ye nahīñ khultā ki haiñ insān yā shaitān shaiḳh

ahl-e-shar to aap ko kahte haiñ amm-e-mohtaram

aur shaitāñ aap ko kahtā hai bhā.ī-jān shaiḳh

be-takalluf haath dho kar baiTh jaate haiñ zarūr

dekh lete haiñ bichhā jis jā pe dastar-ḳhvān shaiḳh

shauq hai lekin ḳhilāf-e-vaza.a apnī jaan kar

mol le kar ḳhud kabhī khāte nahīñ ik paan shaiḳh

go tajāvuz kar chuke haiñ aap bhī sau saal se

byaah kā rakhte haiñ lekin aaj bhī armān shaiḳh

jab ki bīmār-e-mohabbat kā nahīñ mumkin ilaaj

de rahe haiñ phūñk kar bekār use lobān shaiḳh

kaid ho hirs-o-havas ho yā fareb-o-makr ho

aap hī ke haath rahtā hai har ik maidān shaiḳh

'shauq'-sāhab un kī rag rag se haiñ vāqif ḳhuub ham

us kā ho jaa.e divāla jis ke hoñ mehmān shaiḳh

dekhte hain jab kabhi iman mein nuqsan shaiKH

aune-paune bech Dala karte hain iman shaiKH

baad muddat ke jahan mein rahzanon ke din phire

sunte hain phir ho gae hain ab police kaptan shaiKH

har zaban par zikr-e-haq aur dil mein hai yaad-e-butan

ye nahin khulta ki hain insan ya shaitan shaiKH

ahl-e-shar to aap ko kahte hain amm-e-mohtaram

aur shaitan aap ko kahta hai bhai-jaan shaiKH

be-takalluf hath dho kar baiTh jate hain zarur

dekh lete hain bichha jis ja pe dastar-KHwan shaiKH

shauq hai lekin KHilaf-e-waza apni jaan kar

mol le kar KHud kabhi khate nahin ek pan shaiKH

go tajawuz kar chuke hain aap bhi sau sal se

byah ka rakhte hain lekin aaj bhi arman shaiKH

jab ki bimar-e-mohabbat ka nahin mumkin ilaj

de rahe hain phunk kar bekar use loban shaiKH

kaid ho hirs-o-hawas ho ya fareb-o-makr ho

aap hi ke hath rahta hai har ek maidan shaiKH

'shauq'-sahab un ki rag rag se hain waqif KHub hum

us ka ho jae diwala jis ke hon mehman shaiKH