derina KHwahishon se sajaya gaya mujhe

derīna ḳhvāhishoñ se sajāyā gayā mujhe

maqtal meñ kis fareb se laayā gayā mujhe

bār-e-samar se shāḳh-e-shajar jhuk ga.ī to kyā

maiñ be-samar thā phir bhī jhukāyā gayā mujhe

sayyāra-e-zamīñ hai kahāñ sochtā huuñ maiñ

pātāl meñ falak se girāyā gayā mujhe

maiñ naqsh-e-hijr-e-yār huuñ shab kī fasīl par

jaltā huā charāġh banāyā gayā mujhe

laa.e haiñ reza reza kisī aa.ine ke paas

merā hī jism jaise dikhāyā gayā mujhe

patthar meñ jab gulāb mahakte dikhā diye

ye mo.ajiza nahīñ hai batāyā gayā mujhe

chashmoñ ke paas ho ke bhī pyāsā huuñ maiñ 'zafar'

reg-e-ravāñ kā raqs dikhāyā gayā mujhe

derina KHwahishon se sajaya gaya mujhe

maqtal mein kis fareb se laya gaya mujhe

bar-e-samar se shaKH-e-shajar jhuk gai to kya

main be-samar tha phir bhi jhukaya gaya mujhe

sayyara-e-zamin hai kahan sochta hun main

patal mein falak se giraya gaya mujhe

main naqsh-e-hijr-e-yar hun shab ki fasil par

jalta hua charagh banaya gaya mujhe

lae hain reza reza kisi aaine ke pas

mera hi jism jaise dikhaya gaya mujhe

patthar mein jab gulab mahakte dikha diye

ye moajiza nahin hai bataya gaya mujhe

chashmon ke pas ho ke bhi pyasa hun main 'zafar'

reg-e-rawan ka raqs dikhaya gaya mujhe