dhaar kaisi hai ye talwar se kaT kar dekha

dhaar kaisī hai ye talvār se kaT kar dekhā

marhabā chashm ki us ḳhvāb ko DaT kar dekhā

maiñ na kahtā thā ki rah jā.egī mub.ham ho kar

ḳhāmushī ne jo sadāoñ se lipaT kar dekhā

yuuñ lagā jaise ki phir maiñ ne sadā dī tum ko

yuuñ lagā jaise ki phir tum ne palaT kar dekhā

huā mā'lūm vahāñ ḳhatm zamīñ hotī thī

tere dar se jo zarā pīchhe ko haT kar dekhā

apnī vus'at kā use 'ilm huā yuuñ yaaro

us ne ik shab mirī bāñhoñ meñ simaT kar dekhā

farq aayā na koī baat 'ajab hai logo

maiñ ne duniyā ko ka.ī baar ulaT kar dekhā

vo nahīñ aayā magar us ko bulāne ke liye

bujh ke āñkhoñ ne to nīñdoñ ne uchaT kar dekhā

dhaar kaisi hai ye talwar se kaT kar dekha

marhaba chashm ki us KHwab ko DaT kar dekha

main na kahta tha ki rah jaegi mubham ho kar

KHamushi ne jo sadaon se lipaT kar dekha

yun laga jaise ki phir main ne sada di tum ko

yun laga jaise ki phir tum ne palaT kar dekha

hua ma'lum wahan KHatm zamin hoti thi

tere dar se jo zara pichhe ko haT kar dekha

apni wus'at ka use 'ilm hua yun yaro

us ne ek shab meri banhon mein simaT kar dekha

farq aaya na koi baat 'ajab hai logo

main ne duniya ko kai bar ulaT kar dekha

wo nahin aaya magar us ko bulane ke liye

bujh ke aankhon ne to nindon ne uchaT kar dekha