dhaDak raha hai KHayalat ke samundar mein

dhaḌak rahā hai ḳhayālāt ke samundar meñ

vo bah rahā hai mirī zaat ke samundar meñ

badan ko chhoḌ diyā chāñd par baserā hai

kabhī to aa.egā vo raat ke samundar meñ

nahīñ javāb koī sirf shor phailā hai

vo aa chukā hai savālāt ke samundar meñ

vo merī aañkh ke nazzāre meñ samāyā hai

maiñ chhup ga.ī huuñ karāmāt ke samundar meñ

falak ke paas mujhe ik safar pe jaanā hai

zamīñ ke saare tilismāt ke samundar meñ

pighal rahā hai koī fāsloñ kī hiddat se

charāġh jal rahā hai zaat ke samundar meñ

ye kaun hai jo mirī aañkh ke nazāre ko

dikhā.ī de rahā hai raat ke samundar meñ

vo joḌtā hai zamāne ke tāne-bāne ko

bikhar rahā hai rivāyāt ke samundar meñ

vo ek lamha jo hotā hai yā nahīñ hotā

laraz rahā hai vo ḳhadshāt ke samundar meñ

falak meñ tairtī sadiyoñ kā fāsla 'nīlam'

sameT letī hai lamhāt ke samundar meñ

dhaDak raha hai KHayalat ke samundar mein

wo bah raha hai meri zat ke samundar mein

badan ko chhoD diya chand par basera hai

kabhi to aaega wo raat ke samundar mein

nahin jawab koi sirf shor phaila hai

wo aa chuka hai sawalat ke samundar mein

wo meri aankh ke nazzare mein samaya hai

main chhup gai hun karamat ke samundar mein

falak ke pas mujhe ek safar pe jaana hai

zamin ke sare tilismat ke samundar mein

pighal raha hai koi faslon ki hiddat se

charagh jal raha hai zat ke samundar mein

ye kaun hai jo meri aankh ke nazare ko

dikhai de raha hai raat ke samundar mein

wo joDta hai zamane ke tane-bane ko

bikhar raha hai riwayat ke samundar mein

wo ek lamha jo hota hai ya nahin hota

laraz raha hai wo KHadshat ke samundar mein

falak mein tairti sadiyon ka fasla 'nilam'

sameT leti hai lamhat ke samundar mein