dhaDkan bhi munhasir hai meri teri yaad par

dhaḌkan bhī munhasir hai mirī terī yaad par

chaltā nahīñ hai zor dil-e-nā-murād par

guzrī hai aadhī zindagī fikr-e-ma.āsh meñ

itne zarūrī kaam haiñ jo rakkhe baad par

itnā safed ḳhuun hai logoñ kā ab yahāñ

rishta bhī rakhte haiñ kisī zaatī mafād par

rakhtā hai paañv jaise koī apne saa.e par

maiñ ḳhud se laḌ paḌā huuñ ḳhudī ke fasād par

'kaunain' is zamīñ kī koī milkiyat na thī

aadam ne dastaḳhat kiye is jā.edād par

dhaDkan bhi munhasir hai meri teri yaad par

chalta nahin hai zor dil-e-na-murad par

guzri hai aadhi zindagi fikr-e-maash mein

itne zaruri kaam hain jo rakkhe baad par

itna safed KHun hai logon ka ab yahan

rishta bhi rakhte hain kisi zati mafad par

rakhta hai panw jaise koi apne sae par

main KHud se laD paDa hun KHudi ke fasad par

'kaunain' is zamin ki koi milkiyat na thi

aadam ne dastaKHat kiye is jaedad par