Dhalegi raat to niklega aaftab koi

Dhalegī raat to niklegā āftāb koī

ki shahr-e-ḳhvāb pe aa.egā phir azaab koī

kisī kā zikr kahāñ hai mirī kahānī meñ

na jaane kis liye itnā hai aab aab koī

baḌā hasīn sā manzar hai apnī āñkhoñ meñ

dikhā.ī detā hai paanī meñ māhtāb koī

na kaam aa sakīñ hāzir-javābiyāñ merī

mujhe bhī kar gayā pal-bhar meñ lā-javāb koī

maiñ chaah kar bhī kisī moḌ par nahīñ ruktā

dil-o-nigāh meñ rahtā hai iztirāb koī

maiñ harf harf ise paḌh rahā huuñ barsoñ se

ye sail-e-vaqt hai jaise khulī kitāb koī

ye ehtimām-e-nazāra bhī ḳhuub hai 'naushād'

dikhāne aa.ī hai duniyā mujhe bhī ḳhvāb koī

Dhalegi raat to niklega aaftab koi

ki shahr-e-KHwab pe aaega phir azab koi

kisi ka zikr kahan hai meri kahani mein

na jaane kis liye itna hai aab aab koi

baDa hasin sa manzar hai apni aankhon mein

dikhai deta hai pani mein mahtab koi

na kaam aa sakin hazir-jawabiyan meri

mujhe bhi kar gaya pal-bhar mein la-jawab koi

main chah kar bhi kisi moD par nahin rukta

dil-o-nigah mein rahta hai iztirab koi

main harf harf ise paDh raha hun barson se

ye sail-e-waqt hai jaise khuli kitab koi

ye ehtimam-e-nazara bhi KHub hai 'naushad'

dikhane aai hai duniya mujhe bhi KHwab koi