dhoka hai us ka jaanib-e-aghyar dekhna

dhokā hai us kā jānib-e-aġhyār dekhnā

jab ham na hoñ to rañg-e-ruḳh-e-yār dekhnā

tujh se bichhaḌnā yuuñ bhī qayāmat se kam na thā

is par tirā palaT ke vo ik baar dekhnā

apne ġhamoñ kā bojh uThā apne dosh par

tauhīn-e-ġham hai jānib-e-ġham-ḳhvār dekhnā

vo shakl ek ḳhvāb thī aur ḳhvāb ḳhvāb hai

kab tak ye ḳhvāb dīda-e-bedār dekhnā

rahte haiñ shahr-e-sañg meñ shīshe kā dil liye

logo hamārā jazba-e-īsār dekhnā

'ābid' qadam to maqtal-e-fan kī taraf baḌhā

kitne haiñ tere sar ke talabgār dekhnā

dhoka hai us ka jaanib-e-aghyar dekhna

jab hum na hon to rang-e-ruKH-e-yar dekhna

tujh se bichhaDna yun bhi qayamat se kam na tha

is par tera palaT ke wo ek bar dekhna

apne ghamon ka bojh uTha apne dosh par

tauhin-e-gham hai jaanib-e-gham-KHwar dekhna

wo shakl ek KHwab thi aur KHwab KHwab hai

kab tak ye KHwab dida-e-bedar dekhna

rahte hain shahr-e-sang mein shishe ka dil liye

logo hamara jazba-e-isar dekhna

'abid' qadam to maqtal-e-fan ki taraf baDha

kitne hain tere sar ke talabgar dekhna