dhuan sifat hun KHalaon ka hai safar mujhko

dhuāñ sifat huuñ ḳhalāoñ kā hai safar mujh ko

uḌā rahī haiñ havā.eñ idhar udhar mujh ko

maiñ us kī aañkh se gir kar vajūd kho baiThā

vo DhūñDhtā hai bhalā kyuuñ Dagar Dagar mujh ko

javāñ hoñ hausle jis ke vo mere saath chale

kaḌaktī dhuup meñ sahrā kā hai safar mujh ko

badan ko chhoḌ ke terī talāsh meñ niklā

na rok pā.eñge raste meñ bahr-o-bar mujh ko

abhī kuchh aur tirī justujū rulā.egī

abhī kuchh aur bhaTaknā hai dar-ba-dar mujh ko

vo shoḳh shoḳh sī panhāriyāñ kidhar ko ga.iiñ

udaas kar ga.ī panghaT kī rahguzar mujh ko

junūñ ke adnā ishāre pe chauñk jaatā huuñ

ḳhirad kī baat kā hotā nahīñ asar mujh ko

maiñ āsmāñ kī bulandī ko rauñd aayā huuñ

zamīn vāloñ ne samjhā shikasta-par mujh ko

usī ne yaad dilā.ī hai aaj gautam kī

rishī lagā hai ye sūkhā huā shajar mujh ko

miTā rahe haiñ mujhe mere qārī-o-nāqid

kisī ne samjhā kahāñ harf-e-mo'tabar mujh ko

maiñ apne vaqt kā mansūr bhī nahīñ 'hasrat'

ye log kis liye laa.e haiñ daar par mujh ko

dhuan sifat hun KHalaon ka hai safar mujh ko

uDa rahi hain hawaen idhar udhar mujh ko

main us ki aankh se gir kar wajud kho baiTha

wo DhunDhta hai bhala kyun Dagar Dagar mujh ko

jawan hon hausle jis ke wo mere sath chale

kaDakti dhup mein sahra ka hai safar mujh ko

badan ko chhoD ke teri talash mein nikla

na rok paenge raste mein bahr-o-bar mujh ko

abhi kuchh aur teri justuju rulaegi

abhi kuchh aur bhaTakna hai dar-ba-dar mujh ko

wo shoKH shoKH si panhaariyan kidhar ko gain

udas kar gai panghaT ki rahguzar mujh ko

junun ke adna ishaare pe chaunk jata hun

KHirad ki baat ka hota nahin asar mujh ko

main aasman ki bulandi ko raund aaya hun

zamin walon ne samjha shikasta-par mujh ko

usi ne yaad dilai hai aaj gautam ki

rishi laga hai ye sukha hua shajar mujh ko

miTa rahe hain mujhe mere qari-o-naqid

kisi ne samjha kahan harf-e-mo'tabar mujh ko

main apne waqt ka mansur bhi nahin 'hasrat'

ye log kis liye lae hain dar par mujh ko