dhundle dhundle peD ugti sham ki sargoshiyan

dhuñdle dhuñdle peḌ ugtī shaam kī sargoshiyāñ

jo hai shah-e-rag ke qarīñ us naam kī sargoshiyāñ

jab bhī sochā sar uThā kar ab jiyeñge kuchh dinoñ

gher letī haiñ hameñ anjām kī sargoshiyāñ

phir galī kūchoñ meñ sannāToñ kā shāyad raqs ho

bāñTte haiñ log ik paiġhām kī sargoshiyāñ

kyuuñ qabīle meñ bahut se log bad-zan ho ga.e

chāñd ne sun lī thiiñ kal kyā baam kī sargoshiyāñ

raat qatra qatra Tapkeñ aañkh se majbūriyāñ

shaam lamha lamha ubhrīñ jaam kī sargoshiyāñ

aane vaalī rut meñ bhī shāyad na banñe deñ hameñ

aaj tak guzre hue ayyām kī sargoshiyāñ

dhundle dhundle peD ugti sham ki sargoshiyan

jo hai shah-e-rag ke qarin us nam ki sargoshiyan

jab bhi socha sar uTha kar ab jiyenge kuchh dinon

gher leti hain hamein anjam ki sargoshiyan

phir gali kuchon mein sannaTon ka shayad raqs ho

banTte hain log ek paigham ki sargoshiyan

kyun qabile mein bahut se log bad-zan ho gae

chand ne sun li thin kal kya baam ki sargoshiyan

raat qatra qatra Tapken aankh se majburiyan

sham lamha lamha ubhrin jam ki sargoshiyan

aane wali rut mein bhi shayad na banne den hamein

aaj tak guzre hue ayyam ki sargoshiyan