DhunD len hum ko hamari jo KHabar rakhte hain

DhūñD leñ ham ko hamārī jo ḳhabar rakhte haiñ

ham ko dekheñ vo agar husn-e-nazar rakhte haiñ

vāqif-e-rāh haiñ manzil kī ḳhabar rakhte haiñ

kuchh samajh soch ke ham azm-e-safar rakhte haiñ

aañkh ko vaqf-e-sar-e-rāhguzar rakhte haiñ

ḳhaak hone ke liye zauq-e-nazar rakhte haiñ

ishq aur ishq meñ ik shān-e-asar rakhte haiñ

husn kī aañkh mohabbat kī nazar rakhte haiñ

ab vo āñkhoñ se samajh lete haiñ hasrat dil kī

chashm-e-bad-dūr nigāhoñ pe nazar rakhte haiñ

un ke jalvoñ kī haqīqat to unhīñ se pūchho

ham to bijlī ke chamakne kī ḳhabar rakhte haiñ

ik kashish hai ki jo khiñche liye jaatī hai hameñ

varna dīvāne bhī manzil kī ḳhabar rakhte haiñ

dūr-andeshī-e-ulfat ne kiyā hai mohtāt

ham nigāhoñ meñ tirī rāhguzar rakhte haiñ

ek markaz pe simaT aa.ī hai duniyā-e-jamāl

kis kī tasvīr ko ham pesh-e-nazar rakhte haiñ

dil-lagī ishq kī hai husn kā sanjīda mazāq

ham ko dhokā hai ki ham dard-e-jigar rakhte haiñ

dekh leñge tire jalve bhī jo fursat hogī

ham abhī dil kī tajallī pe nazar rakhte haiñ

adab-e-husn hai varna ye mohabbat vaale

sehr āñkhoñ meñ ḳhayāloñ meñ asar rakhte haiñ

aaj kis bazm meñ le aa.ī hai taqdīr 'munīr'

ki farishte bhī mire sāmne sar rakhte haiñ

DhunD len hum ko hamari jo KHabar rakhte hain

hum ko dekhen wo agar husn-e-nazar rakhte hain

waqif-e-rah hain manzil ki KHabar rakhte hain

kuchh samajh soch ke hum azm-e-safar rakhte hain

aankh ko waqf-e-sar-e-rahguzar rakhte hain

KHak hone ke liye zauq-e-nazar rakhte hain

ishq aur ishq mein ek shan-e-asar rakhte hain

husn ki aankh mohabbat ki nazar rakhte hain

ab wo aankhon se samajh lete hain hasrat dil ki

chashm-e-bad-dur nigahon pe nazar rakhte hain

un ke jalwon ki haqiqat to unhin se puchho

hum to bijli ke chamakne ki KHabar rakhte hain

ek kashish hai ki jo khinche liye jati hai hamein

warna diwane bhi manzil ki KHabar rakhte hain

dur-andeshi-e-ulfat ne kiya hai mohtat

hum nigahon mein teri rahguzar rakhte hain

ek markaz pe simaT aai hai duniya-e-jamal

kis ki taswir ko hum pesh-e-nazar rakhte hain

dil-lagi ishq ki hai husn ka sanjida mazaq

hum ko dhoka hai ki hum dard-e-jigar rakhte hain

dekh lenge tere jalwe bhi jo fursat hogi

hum abhi dil ki tajalli pe nazar rakhte hain

adab-e-husn hai warna ye mohabbat wale

sehr aankhon mein KHayalon mein asar rakhte hain

aaj kis bazm mein le aai hai taqdir 'munir'

ki farishte bhi mere samne sar rakhte hain