dhup ke dasht mein be-saya shajar mein hum the

dhuup ke dasht meñ be-sāya shajar meñ ham the

munhamik phir bhī sarāboñ ke safar meñ ham the

muntashir kar chukī āñdhī to ye ma.alūm huā

ik bagūle kī tarah ret ke ghar meñ ham the

terī āvāz ke jaadū ne ḳhabar-dār kiyā

nā-samajh the ki balāoñ ke asar meñ ham the

tā na shākī rahe dariyā-e-havas kī koī mauj

bādbāñ jism ke khole ki bhañvar meñ ham the

ye tire qurb kā e.ajāz hai varna pahle

taaq itne kahāñ jiine ke hunar meñ ham the

dhup ke dasht mein be-saya shajar mein hum the

munhamik phir bhi sarabon ke safar mein hum the

muntashir kar chuki aandhi to ye malum hua

ek bagule ki tarah ret ke ghar mein hum the

teri aawaz ke jadu ne KHabar-dar kiya

na-samajh the ki balaon ke asar mein hum the

ta na shaki rahe dariya-e-hawas ki koi mauj

baadban jism ke khole ki bhanwar mein hum the

ye tere qurb ka eajaz hai warna pahle

taq itne kahan jine ke hunar mein hum the