dhup qismat hai to phir dhup ka KHugar hona

dhuup qismat hai to phir dhuup kā ḳhūgar honā

kyā zarūrī hai sadā saaya kā sar par honā

kyoñ na ham lamha-e-maujūd meñ hañs kar jī leñ

jab ki mumkin nahīñ hālāt kā behtar honā

sirf qissoñ kī kitāboñ meñ paḌhā karte the

ham ne dekhā na thā insān kā patthar honā

sirf sūrat nahīñ sīrat bhī bigaḌ jaatī hai

ik 'ajab rog hai haarā huā lashkar honā

naam jis haal kā sahrā meñ hai āzāda-ravī

shahr meñ us ko kahā jaatā hai be-ghar honā

ho gayā itnā to 'yūnus' kī ġhazal se zāhir

ahd-e-hāzir meñ bhī mumkin hai suḳhan-var honā

dhup qismat hai to phir dhup ka KHugar hona

kya zaruri hai sada saya ka sar par hona

kyon na hum lamha-e-maujud mein hans kar ji len

jab ki mumkin nahin haalat ka behtar hona

sirf qisson ki kitabon mein paDha karte the

hum ne dekha na tha insan ka patthar hona

sirf surat nahin sirat bhi bigaD jati hai

ek 'ajab rog hai haara hua lashkar hona

nam jis haal ka sahra mein hai aazada-rawi

shahr mein us ko kaha jata hai be-ghar hona

ho gaya itna to 'yunus' ki ghazal se zahir

ahd-e-hazir mein bhi mumkin hai suKHan-war hona