dhyan dastak pe laga rahta hai

dhyān dastak pe lagā rahtā hai

aur darvāza khulā rahtā hai

kisī malbe se nahīñ pur hotā

mere andar jo ḳhalā rahtā hai

khīñchtā hai vo lakīreñ kyā kyā

aur phir un meñ ghirā rahtā hai

ham ko ḳhāmosh na jaano sāhab

andar ik shor bapā rahtā hai

mujh ko de detā hai gahre paanī

ḳhud jazīroñ pe basā rahtā hai

merī tanhā.ī kī pagDanDī par

mere ham-rāh ḳhudā rahtā hai

ḳhaak bhī rahtī nahīñ insāñ kī

naam patthar pe khudā rahtā hai

rañg-o-bū bharte haiñ is kā paanī

mazbale par jo paḌā rahtā hai

qumqume rahte haiñ raushan 'betāb'

dil hī kam-baḳht bujhā rahtā hai

dhyan dastak pe laga rahta hai

aur darwaza khula rahta hai

kisi malbe se nahin pur hota

mere andar jo KHala rahta hai

khinchta hai wo lakiren kya kya

aur phir un mein ghira rahta hai

hum ko KHamosh na jaano sahab

andar ek shor bapa rahta hai

mujh ko de deta hai gahre pani

KHud jaziron pe basa rahta hai

meri tanhai ki pagDanDi par

mere ham-rah KHuda rahta hai

KHak bhi rahti nahin insan ki

nam patthar pe khuda rahta hai

rang-o-bu bharte hain is ka pani

mazbale par jo paDa rahta hai

qumqume rahte hain raushan 'betab'

dil hi kam-baKHt bujha rahta hai