dida-e-ashk-bar le ke chale

dīda-e-ashk-bār le ke chale

ham tirī yādgār le ke chale

dil meñ tasvīr-e-yār le ke chale

ham qafas meñ bahār le ke chale

ḳhvāhish-e-dīd le ke aa.e the

hasrat-e-intizār le ke chale

sāmne us ke ek bhī na chalī

dil meñ bāteñ hazār le ke chale

havas-e-gul meñ ham bhī aa.e the

dāman-e-tār-tār le ke chale

jo mire saath Dūbnā chāhe

mujh ko dariyā ke paar le ke chale

tum se apnā hī baar uTh na sakā

ham zamāne kā baar le ke chale

ham na iisā na sarmad o mansūr

log kyuuñ sū-e-dār le ke chale

bhar ke dāman meñ ḳhaak us dar kī

ham to kū-e-nigār le ke chale

zindagī muḳhtasar milī thī hameñ

hasrateñ be-shumār le ke chale

ruup naġhmoñ kā de ke ham 'naushād'

apne dil kī pukār le ke chale

dida-e-ashk-bar le ke chale

hum teri yaadgar le ke chale

dil mein taswir-e-yar le ke chale

hum qafas mein bahaar le ke chale

KHwahish-e-did le ke aae the

hasrat-e-intizar le ke chale

samne us ke ek bhi na chali

dil mein baaten hazar le ke chale

hawas-e-gul mein hum bhi aae the

daman-e-tar-tar le ke chale

jo mere sath Dubna chahe

mujh ko dariya ke par le ke chale

tum se apna hi bar uTh na saka

hum zamane ka bar le ke chale

hum na isa na sarmad o mansur

log kyun su-e-dar le ke chale

bhar ke daman mein KHak us dar ki

hum to ku-e-nigar le ke chale

zindagi muKHtasar mili thi hamein

hasraten be-shumar le ke chale

rup naghmon ka de ke hum 'naushad'

apne dil ki pukar le ke chale