dida-o-danista dhoka kha gae

dīda-o-dānista dhokā khā ga.e

ham fareb-e-zindagī meñ aa ga.e

jab hujūm-e-shauq se ghabrā ga.e

kho ga.e ḳhud aur tum ko pā ga.e

chain bhī lene nahīñ dete mujhe

maiñ abhī bhūlā thā phir yaad aa ga.e

maiñ kahāñ jā.ūñ nazar ko kyā karūñ

aap to saarī fazā par chhā ga.e

dil hī dil meñ uf vo dard-e-nā-gahāñ

āñkhoñ hī āñkhoñ meñ kuchh samjhā ga.e

ruḳh se āñchal bhī na sarkā thā abhī

nīchī nazreñ ho ga.iiñ sharmā ga.e

uf ye ġhunchoñ kā tabassum ye bahār

haif agar ye ġhunche kal murjhā ga.e

jis qadar ġhunche khile the nau-ba-nau

merī āñkhoñ se lahū barsā ga.e

pūchhte kyā ho in ashkoñ kā sabab

vāqi.āt-e-rafta phir yaad aa ga.e

ab to shor apnā fasāna ḳhatm kar

un kī āñkhoñ meñ bhī aañsū aa ga.e

dida-o-danista dhoka kha gae

hum fareb-e-zindagi mein aa gae

jab hujum-e-shauq se ghabra gae

kho gae KHud aur tum ko pa gae

chain bhi lene nahin dete mujhe

main abhi bhula tha phir yaad aa gae

main kahan jaun nazar ko kya karun

aap to sari faza par chha gae

dil hi dil mein uf wo dard-e-na-gahan

aankhon hi aankhon mein kuchh samjha gae

ruKH se aanchal bhi na sarka tha abhi

nichi nazren ho gain sharma gae

uf ye ghunchon ka tabassum ye bahaar

haif agar ye ghunche kal murjha gae

jis qadar ghunche khile the nau-ba-nau

meri aankhon se lahu barsa gae

puchhte kya ho in ashkon ka sabab

waqiat-e-rafta phir yaad aa gae

ab to shor apna fasana KHatm kar

un ki aankhon mein bhi aansu aa gae