didar tere husn ka bas aankh bhar karun

dīdār tere husn kā bas aañkh bhar karūñ

aur phir isī surūr meñ pahroñ basar karūñ

misroñ meñ Dhal ke aap ke dil meñ utar sakeñ

itnā maiñ har ḳhayāl ko bārīk-tar karūñ

ai zindagī batā mujhe tū ne diyā hai kyā

terā yaqīñ karūñ bhī to kis baat par karūñ

ye bhī to ik tarah se mohabbat kī haar hai

ḳhud ko tumhāre hijr meñ barbād gar karūñ

merī masāfatoñ kī koī intihā to ho

in ābloñ ke saath maiñ kab tak safar karūñ

har shaḳhs kī zabān pe 'kāfir' kā naam ho

itnā maiñ apne aap ko ab nāmvar karūñ

didar tere husn ka bas aankh bhar karun

aur phir isi surur mein pahron basar karun

misron mein Dhal ke aap ke dil mein utar saken

itna main har KHayal ko barik-tar karun

ai zindagi bata mujhe tu ne diya hai kya

tera yaqin karun bhi to kis baat par karun

ye bhi to ek tarah se mohabbat ki haar hai

KHud ko tumhaare hijr mein barbaad gar karun

meri masafaton ki koi intiha to ho

in aablon ke sath main kab tak safar karun

har shaKHs ki zaban pe 'kafir' ka nam ho

itna main apne aap ko ab namwar karun