didani hain dil-e-KHarab ke rang

dīdanī haiñ dil-e-ḳharāb ke rañg

aah us chashm-e-pur-hijāb ke rañg

fasl-e-gul meñ paḌeñ to ḳhuub khileñ

ḳhirqa-e-zohad par sharāb ke rañg

shauq-e-mai dil meñ lab pe hijv-e-sharāb

ham pe raushan haiñ sab janāb ke rañg

nahīñ tauba kī ḳhair haiñ jo yahī

josh-e-hañgāma-e-sahāb ke rañg

kal ke maqbūl aaj haiñ mardūd

aah is daur-e-inqilāb ke rañg

qābil-e-dīd haiñ visāl kī shab

ārzū-hā-e-kāmyāb ke rañg

chehra-e-āshiqī hai pazh-murda

kyā hue vo mai-e-shabāb ke rañg

ḳhail-e-ḳhūbāñ se ek meñ bhī nahīñ

aap ke husn-e-lā-javāb ke rañg

merī māyūsiyoñ se haiñ paidā

kashmakash-hā-e-iztirāb ke rañg

dil ke hāthoñ bahut rahe haiñ ḳharāb

'hasrat'-e-ḳhānumāñ ḳharāb ke rañg

didani hain dil-e-KHarab ke rang

aah us chashm-e-pur-hijab ke rang

fasl-e-gul mein paDen to KHub khilen

KHirqa-e-zohad par sharab ke rang

shauq-e-mai dil mein lab pe hijw-e-sharab

hum pe raushan hain sab janab ke rang

nahin tauba ki KHair hain jo yahi

josh-e-hangama-e-sahab ke rang

kal ke maqbul aaj hain mardud

aah is daur-e-inqilab ke rang

qabil-e-did hain visal ki shab

aarzu-ha-e-kaamyab ke rang

chehra-e-ashiqi hai pazh-murda

kya hue wo mai-e-shabab ke rang

KHail-e-KHuban se ek mein bhi nahin

aap ke husn-e-la-jawab ke rang

meri mayusiyon se hain paida

kashmakash-ha-e-iztirab ke rang

dil ke hathon bahut rahe hain KHarab

'hasrat'-e-KHanuman KHarab ke rang