diwangi-e-dil ki tauqir nahin hoti

dīvāngī-e-dil kī tauqīr nahīñ hotī

ab ḳhāk-e-mohabbat bhī iksīr nahīñ hotī

ai barq-e-fanā tū hī taqdīr mirī ban jā

ġhārat-gar-e-sāmāñ se tadbīr nahīñ hotī

kyoñ dekhte haiñ mujh ko hairat se jahāñ vaale

kyā ġham kī yahāñ koī tasvīr nahīñ hotī

maiñ lā.iq-e-kushtan huuñ ye sach hai magar dekho

taqdīr bigaḌ jaanā taqsīr nahīñ hotī

ādāb-e-vafā sīkho andāz-e-jafā chhoḌo

yuuñ qasr-e-mohabbat kī tā'mīr nahīñ hotī

kyoñ dard nahīñ baḌhtā kyoñ maut nahīñ aatī

kyoñ ḳhvāb-e-pareshāñ kī tā'bīr nahīñ hotī

tāsīr-e-mohabbat se aa.heñ to huiiñ paidā

aahoñ meñ 'nazar' paidā tāsīr nahīñ hotī

diwangi-e-dil ki tauqir nahin hoti

ab KHak-e-mohabbat bhi iksir nahin hoti

ai barq-e-fana tu hi taqdir meri ban ja

ghaarat-gar-e-saman se tadbir nahin hoti

kyon dekhte hain mujh ko hairat se jahan wale

kya gham ki yahan koi taswir nahin hoti

main laiq-e-kushtan hun ye sach hai magar dekho

taqdir bigaD jaana taqsir nahin hoti

aadab-e-wafa sikho andaz-e-jafa chhoDo

yun qasr-e-mohabbat ki ta'mir nahin hoti

kyon dard nahin baDhta kyon maut nahin aati

kyon KHwab-e-pareshan ki ta'bir nahin hoti

tasir-e-mohabbat se aahen to huin paida

aahon mein 'nazar' paida tasir nahin hoti