diwangi ki tujhko bhi ai kash KHu mile

dīvāngī kī tujh ko bhī ai kaash ḳhū mile

maiñ chār-sū dikhā.ī duuñ tū chār-sū mile

ye intihā-e-ishq hai yā irtiqā-e-husn

har shai meñ merā rang mile terī bū mile

josh-e-hayā se paak huī ārzū-e-dil

ḳhalvat meñ do javān badan bā-vazū mile

do chaar bāteñ aur mukammal ḳhamoshiyāñ

ham donoñ yuuñ to der talak rū-ba-rū mile

vallāh tū to phuul hai pahlī bahār kā

vo kitnā ḳhush-nasīb hai jis ko ki tū mile

yuuñ to tire ḳhud apne hī armān kam nahīñ

ai kaash tere dil ko mirī aarzū mile

diwangi ki tujh ko bhi ai kash KHu mile

main chaar-su dikhai dun tu chaar-su mile

ye intiha-e-ishq hai ya irtiqa-e-husn

har shai mein mera rang mile teri bu mile

josh-e-haya se pak hui aarzu-e-dil

KHalwat mein do jawan badan ba-wazu mile

do chaar baaten aur mukammal KHamoshiyan

hum donon yun to der talak ru-ba-ru mile

wallah tu to phul hai pahli bahaar ka

wo kitna KHush-nasib hai jis ko ki tu mile

yun to tere KHud apne hi arman kam nahin

ai kash tere dil ko meri aarzu mile