diwangi ne kya kya aalam dikha diye hain

dīvāngī ne kyā kyā 'ālam dikhā diye haiñ

pariyoñ ne khiḌkiyoñ ke parde uThā diye haiñ

allāh-re faroġh us ruḳhsār-e-ātishīñ kā

sham.oñ ke rañg misl-e-kāfūr uḌā diye haiñ

ātish-nafs havā hai gulzār kī hamāre

bijlī girī hai ġhunche jab muskurā diye haiñ

sau baar gul ko us ne talvoñ tale malā hai

kaTvā ke sarv shamshād aksar jalā diye haiñ

insān-e-ḳhūb-rū se baaqī rahe tafāvut

is vāste parī ko do par lagā diye haiñ

abrū-e-kaj se ḳhūn-e-ushshāq kyā 'ajab hai

talvār ne nishān-e-lashkar miTā diye haiñ

kis kis ko ḳhuub kahiye allāh ne butoñ ko

kyā gosh o chashm kyā lab kyā dast-o-pā diye haiñ

be-yār baam par jo vahshat meñ chaḌh gayā huuñ

parnāle rote rote maiñ ne bahā diye haiñ

vasf-e-kamān-e-abrū jo kījiye so kam hai

be-tīr bismiloñ ke tuude lagā diye haiñ

royā huuñ yaad kar ke maiñ terī tund-ḳhūī

sarsar ne jab charāġh-e-raushan bujhā diye haiñ

soz-e-dil-o-jigar kī shiddat phir āj-kal hai

phir pahluoñ ke takiye mash'al banā diye haiñ

sham.oñ ko tū ne dil se parvānoñ ke utārā

āñkhoñ se bulbuloñ kī gulshan girā diye haiñ

vo bāda-kash huuñ merī āvāz-e-pā ko sun kar

shīshoñ ne sar huzūr-e-sāġhar jhukā diye haiñ

ashkoñ se ḳhāna-e-tan 'ātish' ḳharāb hogā

qasr-e-sipihr-e-rif.at bārāñ ne Dhā diye haiñ

diwangi ne kya kya 'alam dikha diye hain

pariyon ne khiDkiyon ke parde uTha diye hain

allah-re farogh us ruKHsar-e-atishin ka

shamon ke rang misl-e-kafur uDa diye hain

aatish-nafs hawa hai gulzar ki hamare

bijli giri hai ghunche jab muskura diye hain

sau bar gul ko us ne talwon tale mala hai

kaTwa ke sarw shamshad aksar jala diye hain

insan-e-KHub-ru se baqi rahe tafawut

is waste pari ko do par laga diye hain

abru-e-kaj se KHun-e-ushshaq kya 'ajab hai

talwar ne nishan-e-lashkar miTa diye hain

kis kis ko KHub kahiye allah ne buton ko

kya gosh o chashm kya lab kya dast-o-pa diye hain

be-yar baam par jo wahshat mein chaDh gaya hun

parnale rote rote main ne baha diye hain

wasf-e-kaman-e-abru jo kijiye so kam hai

be-tir bismilon ke tude laga diye hain

roya hun yaad kar ke main teri tund-KHui

sarsar ne jab charagh-e-raushan bujha diye hain

soz-e-dil-o-jigar ki shiddat phir aaj-kal hai

phir pahluon ke takiye mash'al bana diye hain

shamon ko tu ne dil se parwanon ke utara

aankhon se bulbulon ki gulshan gira diye hain

wo baada-kash hun meri aawaz-e-pa ko sun kar

shishon ne sar huzur-e-saghar jhuka diye hain

ashkon se KHana-e-tan 'atish' KHarab hoga

qasr-e-sipihr-e-rifat baran ne Dha diye hain