diwar-o-dar ko aur bhi viran kar gae

dīvār-o-dar ko aur bhī vīrān kar ga.e

vo sab bichhaḌne vaale bichhaḌ kar kidhar ga.e

in mushkiloñ ne kaam ye āsān kar diyā

kuchh log vaqt rahte hī dil se utar ga.e

kāñTā sahī maiñ shāḳh pe apnī jagah to huuñ

nāzuk vo gul tamām havā se bikhar ga.e

taarī rahā sukūt mire ghar meñ der tak

āvāzeñ apnī chhoḌ ke jab dost ghar ga.e

har chiiz shahr-e-ishq meñ mahñgī thī is qadar

lauT aa.e ḳhālī haath hī jab jab udhar ga.e

ham the anā-parast so rokā nahīñ use

par us ke lauT aane kī ḳhvāhish meñ mar ga.e

diwar-o-dar ko aur bhi viran kar gae

wo sab bichhaDne wale bichhaD kar kidhar gae

in mushkilon ne kaam ye aasan kar diya

kuchh log waqt rahte hi dil se utar gae

kanTa sahi main shaKH pe apni jagah to hun

nazuk wo gul tamam hawa se bikhar gae

tari raha sukut mere ghar mein der tak

aawazen apni chhoD ke jab dost ghar gae

har chiz shahr-e-ishq mein mahngi thi is qadar

lauT aae KHali hath hi jab jab udhar gae

hum the ana-parast so roka nahin use

par us ke lauT aane ki KHwahish mein mar gae