dikha kar ek nazar dil ko nihayat kar gaya bekal

dikhā kar ik nazar dil ko nihāyat kar gayā bekal

parī-rū tund-ḳhū sarkash haTelā chulbulā chanchal

vo aariz aur jabīñ-tābāñ ki hoñ dekh us ko sharminda

qamar ḳhurshīd zohra sham.a sho.ala mushtarī mash.al

kafoñ meñ uñgliyoñ meñ la.al meñ aur chashm-e-maigūñ meñ

hinā aafat sitam funduq misī jaadū fusūñ kājal

badan meñ jāma-e-zar-kash sarāpā jis pe zeb-āvar

kaḌe bunde chhaḌe chhalle añgūThī nau-ratan haikal

nazākat aur latāfat vo kaf-e-pā tak ki hairāñ huuñ

saman gul laala nasrīñ nastaran darparniyāñ maḳhmal

sarāsar pur-fareb aisā ki zāhir jis kī nazroñ se

sharārat shoḳhī ayyārī tarah phurtī daġhā chhalbal

'nazīr' ik umr-e-ishrat ho mile aisā parī-paikar

agar ik aan agar ik dam agar ik chhan agar ik pal

dikha kar ek nazar dil ko nihayat kar gaya bekal

pari-ru tund-KHu sarkash haTela chulbula chanchal

wo aariz aur jabin-taban ki hon dekh us ko sharminda

qamar KHurshid zohra shama shoala mushtari mashal

kafon mein ungliyon mein lal mein aur chashm-e-maigun mein

hina aafat sitam funduq misi jadu fusun kajal

badan mein jama-e-zar-kash sarapa jis pe zeb-awar

kaDe bunde chhaDe chhalle anguThi nau-ratan haikal

nazakat aur latafat wo kaf-e-pa tak ki hairan hun

saman gul lala nasrin nastaran darparniyan maKHmal

sarasar pur-fareb aisa ki zahir jis ki nazron se

shararat shoKHi ayyari tarah phurti dagha chhalbal

'nazir' ek umr-e-ishrat ho mile aisa pari-paikar

agar ek aan agar ek dam agar ek chhan agar ek pal