dikhai dengi sabhi mumkinat kaghaz par

dikhā.ī deñgī sabhī mumkināt kāġhaz par

zarā utaar to luuñ sab jihāt kāġhaz par

marī kahānī bahut der se rukī huī hai

vo kho gayā hai kahīñ rakh ke haath kāġhaz par

hamārī taaza ġhazal meñ bhī aks hai us kā

vo ek ashk jo Tapkā thā raat kāġhaz par

meñ thak chukā huuñ faqat rā.egāniyāñ likhte

uñDel duuñ na kahīñ ab davāt kāġhaz par

kise ḳhabar ki ye raddī meñ bech dī jaa.e

banā rahā huuñ maiñ jo kā.enāt kāġhaz par

maiñ likh rahā thā tirī ḳhvāb-gāh kī yādeñ

ki so gayā thā vahīñ rakh ke haath kāġhaz par

dikhai dengi sabhi mumkinat kaghaz par

zara utar to lun sab jihat kaghaz par

mari kahani bahut der se ruki hui hai

wo kho gaya hai kahin rakh ke hath kaghaz par

hamari taza ghazal mein bhi aks hai us ka

wo ek ashk jo Tapka tha raat kaghaz par

mein thak chuka hun faqat raeganiyan likhte

unDel dun na kahin ab dawat kaghaz par

kise KHabar ki ye raddi mein bech di jae

bana raha hun main jo kaenat kaghaz par

main likh raha tha teri KHwab-gah ki yaaden

ki so gaya tha wahin rakh ke hath kaghaz par