dikhai deta hai ab kuchh dikhai deta hai

dikhā.ī detā hai ab kuchh dikhā.ī detā hai

is intizār meñ kab kuchh dikhā.ī detā hai

sarāb hai ki samundar hubāb hai ki guhar

kahāñ haiñ tishna-ba-lab kuchh dikhā.ī detā hai

ḳhushī vujūd meñ utrī huī sī lagtī hai

khulī ho aañkh to sab kuchh dikhā.ī detā hai

mire bayān ke ḳhālis-tarīn lafzoñ meñ

zabāñ kā lams ġhazab kuchh dikhā.ī detā hai

ye merā jism zamīñ par hai fan bulandī par

kisī ko is kā sabab kuchh dikhā.ī detā hai

kiyā hai ġhaur to pahuñche haiñ is natīje par

ki apnā haal 'ajab kuchh dikhā.ī detā hai

kiye-karā.e pe paanī na pher jaa.e ġhurūr

ki baat kahne kā Dhab kuchh dikhā.ī detā hai

nazar pe naaz burī chiiz to nahīñ hai 'nishāt'

zamāna lagtā hai tab kuchh dikhā.ī detā hai

dikhai deta hai ab kuchh dikhai deta hai

is intizar mein kab kuchh dikhai deta hai

sarab hai ki samundar hubab hai ki guhar

kahan hain tishna-ba-lab kuchh dikhai deta hai

KHushi wujud mein utri hui si lagti hai

khuli ho aankh to sab kuchh dikhai deta hai

mere bayan ke KHalis-tarin lafzon mein

zaban ka lams ghazab kuchh dikhai deta hai

ye mera jism zamin par hai fan bulandi par

kisi ko is ka sabab kuchh dikhai deta hai

kiya hai ghaur to pahunche hain is natije par

ki apna haal 'ajab kuchh dikhai deta hai

kiye-karae pe pani na pher jae ghurur

ki baat kahne ka Dhab kuchh dikhai deta hai

nazar pe naz buri chiz to nahin hai 'nishat'

zamana lagta hai tab kuchh dikhai deta hai