dikhai deti hai jo shakl wo bani hi na ho

dikhā.ī detī hai jo shakl vo banī hī na ho

ajab nahīñ ki kahānī kahī ga.ī hī na ho

jo kho chukā hai vahī ab ho merā sarmāya

jo mil gayā hai mujhe vo mirī kamī hī na ho

likhā hī rah na gayā ho kahīñ mirā qissa

guzār dī hai jo vo merī zindagī hī na ho

hai kaun jis kī ho tahrīr is qadar saffāk

ye zindagī mirī apnī likhī huī hī na ho

dikhā.ī detā bhī hai ik tilism aur agar

maiñ jis meñ dekh rahā huuñ vo raushnī hī na ho

vahāñ se ḳhvāb koī aur le uḌā ho use

mirī nigāh tirī aañkh meñ rukī hī na ho

ḳhudā-e-dahr mirā hī shu.ūr hai 'kāshif'

to kā.enāt kī sāzish kahīñ mirī hī na ho

dikhai deti hai jo shakl wo bani hi na ho

ajab nahin ki kahani kahi gai hi na ho

jo kho chuka hai wahi ab ho mera sarmaya

jo mil gaya hai mujhe wo meri kami hi na ho

likha hi rah na gaya ho kahin mera qissa

guzar di hai jo wo meri zindagi hi na ho

hai kaun jis ki ho tahrir is qadar saffak

ye zindagi meri apni likhi hui hi na ho

dikhai deta bhi hai ek tilism aur agar

main jis mein dekh raha hun wo raushni hi na ho

wahan se KHwab koi aur le uDa ho use

meri nigah teri aankh mein ruki hi na ho

KHuda-e-dahr mera hi shuur hai 'kashif'

to kaenat ki sazish kahin meri hi na ho