dikhane rasta mujhko chala hai

dikhāne rāsta mujh ko chalā hai

jo ḳhud hī raah se bhaTkā huā hai

ḳhushī ko DhūñDne jab bhī chalā huuñ

dukhoñ kā ik ghanā jangal milā hai

tabāhī kā kise duuñ dosh apnī

mirā dushman mire andar chhupā hai

kahīñ tū kho na de apnā nishāñ bhī

jahāñ kī bhiiḌ meñ kyoñ kho gayā hai

makānoñ meñ makīñ sahme hue haiñ

ufuq se phir uThī kaalī ghaTā hai

hamārā haq bhī hai is raushnī par

charāġhoñ ko lahū ham ne diyā hai

navāzish bhī rahī hai us kī 'hātif'

sitam bhī vo kare to ab ravā hai

dikhane rasta mujh ko chala hai

jo KHud hi rah se bhaTka hua hai

KHushi ko DhunDne jab bhi chala hun

dukhon ka ek ghana jangal mila hai

tabahi ka kise dun dosh apni

mera dushman mere andar chhupa hai

kahin tu kho na de apna nishan bhi

jahan ki bhiD mein kyon kho gaya hai

makanon mein makin sahme hue hain

ufuq se phir uThi kali ghaTa hai

hamara haq bhi hai is raushni par

charaghon ko lahu hum ne diya hai

nawazish bhi rahi hai us ki 'hatif'

sitam bhi wo kare to ab rawa hai