dikhaun chir kar pahlu kise dil ranj-e-furqat mein

dikhā.ūñ chiir kar pahlū kise dil ranj-e-furqat meñ

har ik se pūchhtā huuñ der kitnī hai qayāmat meñ

junūñ kā zor hai ye āj-kal merī tabī.at meñ

ki hairāñ ho rahe haiñ mast aahū chīn-o-tibbat meñ

judā sar kis tarah ho āstāñ se tere o zālim

hai likkhā tere darvāze kā patthar merī qismat meñ

havā.eñ tere kūche kī jo yaad aa jā.eñgī mujh ko

dar-o-dīvār dozaḳh ke dikhā.ī deñge jannat meñ

rah-e-mai-ḳhāna se ham bhuul kar masjid meñ aa pahuñche

ḳhalal apnī taraf se hai magar saaqī kī niyyat meñ

sharārat se nahīñ ḳhālī sitamgar sharmgīñ āñkheñ

nihāñ haiñ shoḳhiyāñ lākhoñ tirī bholī sī sūrat meñ

nazar se merī aisā kaun guzrā kis liye mujh ko

liye phirtā hai dil har majma.a-e-arbāb-e-sūrat meñ

na pūchho dil-farebī ahd-e-mastī-hā-e-ulfat kī

nikalnā haa.e vo ghar se merā josh-e-mohabbat meñ

digar-gūñ sub.h se hāl-e-dil-e-betāb hai apnā

ilāhī raat kaun aaya hamāre ḳhvāb-e-rāhat meñ

raho 'nāyāb' tum masrūf abhī kuchh raat baaqī hai

jigar bahtā chale ho kar lahū ashk-e-nadāmat meñ

dikhaun chir kar pahlu kise dil ranj-e-furqat mein

har ek se puchhta hun der kitni hai qayamat mein

junun ka zor hai ye aaj-kal meri tabiat mein

ki hairan ho rahe hain mast aahu chin-o-tibbat mein

juda sar kis tarah ho aastan se tere o zalim

hai likkha tere darwaze ka patthar meri qismat mein

hawaen tere kuche ki jo yaad aa jaengi mujh ko

dar-o-diwar dozaKH ke dikhai denge jannat mein

rah-e-mai-KHana se hum bhul kar masjid mein aa pahunche

KHalal apni taraf se hai magar saqi ki niyyat mein

shararat se nahin KHali sitamgar sharmgin aankhen

nihan hain shoKHiyan lakhon teri bholi si surat mein

nazar se meri aisa kaun guzra kis liye mujh ko

liye phirta hai dil har majma-e-arbab-e-surat mein

na puchho dil-farebi ahd-e-masti-ha-e-ulfat ki

nikalna hae wo ghar se mera josh-e-mohabbat mein

digar-gun subh se haal-e-dil-e-betab hai apna

ilahi raat kaun aaya hamare KHwab-e-rahat mein

raho 'nayab' tum masruf abhi kuchh raat baqi hai

jigar bahta chale ho kar lahu ashk-e-nadamat mein