dil aaina hai jauhar-e-aks ru hai

dil aa.ina hai jauhar-e-aks rū hai

yuuñ hī tujh se maiñ huuñ yuuñ hī mujh meñ tū hai

agar gul hai tū jān-e-bulbul bhī tū hai

tū har rañg meñ rañg tū har bū meñ bū hai

mirī ḳhaak ashk-e-nadāmat se tar hai

tayammum bhī kariye to hukm-e-vuzū hai

bajā lan-tarānī hai ḳhāmosh haiñ ham

jo uTh jaa.e parda to phir guftugū hai

tirī zulf-e-purḳham kā dīvāna huuñ maiñ

na zanjīr-e-pā hai na tauq-e-gulū hai

tasavvur meñ abrū ke jo mar gayā huuñ

pas-e-marg ka.aba mire rū-ba-rū hai

garebān-e-sad-chāk hai dāman-e-gul

na paivand kī jā na kār-e-rafū hai

tire muñh ko dekhūñ tire saath so.uuñ

ye hī hasrat-e-dil ye hī aarzū hai

maiñ daurān-e-sar se jo sar phoḌtā huuñ

na mai hai na saaqī na jām-e-subū hai

chhurī kyā hai talvār bhī maar qātil

qabā-e-badan ko bhī shauq-e-rafū hai

nahātā hai ġhairoñ ke hamrāh qātil

mire āb-e-shamshīr hī tā-gulū hai

tire jalve se hai dil-e-'arsh' raushan

jo vo sub.h-e-sādiq to ḳhurshīd tū hai

dil aaina hai jauhar-e-aks ru hai

yun hi tujh se main hun yun hi mujh mein tu hai

agar gul hai tu jaan-e-bulbul bhi tu hai

tu har rang mein rang tu har bu mein bu hai

meri KHak ashk-e-nadamat se tar hai

tayammum bhi kariye to hukm-e-wuzu hai

baja lan-tarani hai KHamosh hain hum

jo uTh jae parda to phir guftugu hai

teri zulf-e-purKHam ka diwana hun main

na zanjir-e-pa hai na tauq-e-gulu hai

tasawwur mein abru ke jo mar gaya hun

pas-e-marg kaba mere ru-ba-ru hai

gareban-e-sad-chaak hai daman-e-gul

na paiwand ki ja na kar-e-rafu hai

tere munh ko dekhun tere sath soun

ye hi hasrat-e-dil ye hi aarzu hai

main dauran-e-sar se jo sar phoDta hun

na mai hai na saqi na jam-e-subu hai

chhuri kya hai talwar bhi mar qatil

qaba-e-badan ko bhi shauq-e-rafu hai

nahata hai ghairon ke hamrah qatil

mere aab-e-shamshir hi ta-gulu hai

tere jalwe se hai dil-e-'arsh' raushan

jo wo subh-e-sadiq to KHurshid tu hai