dil aisa ishrat-o-rahat ki KHwahishon mein jala

dil aisā ishrat-o-rāhat kī ḳhvāhishoñ meñ jalā

tamām umr maiñ be-nām hasratoñ meñ jalā

ye kal kī baat hai zehnoñ meñ gūñjtī hogī

charāġh ek havāoñ ke rāstoñ meñ jalā

mire ḳhulūs ke saa.e meñ kaash jī saktā

mirā harīf jalā bhī to sāzishoñ meñ jalā

fazāoñ meñ jo añdhere bikher detā hai

vahī charāġh-e-adāvat magar diloñ meñ jalā

ye aur baat abhī raushnī nahīñ phailī

koī diyā to magar ġham kī zulmatoñ meñ jalā

vo kaun haiñ jinheñ saaya lagī firāq kī aañch

mirā badan to hamesha rafāqatoñ meñ jalā

yahī nahīñ ki farozāñ thī intizār kī aag

charāġh-e-dard bhī barsāt kī rutoñ meñ jalā

na-jāne khā ga.ī kis kī nazar bahāroñ ko

ye ek shahr-e-mohabbat thā nafratoñ meñ jalā

vafā kī aag meñ kundan banā to hairat kyā

'sirāj' vaise bhī ahbāb ke dukhoñ meñ jalā

dil aisa ishrat-o-rahat ki KHwahishon mein jala

tamam umr main be-nam hasraton mein jala

ye kal ki baat hai zehnon mein gunjti hogi

charagh ek hawaon ke raston mein jala

mere KHulus ke sae mein kash ji sakta

mera harif jala bhi to sazishon mein jala

fazaon mein jo andhere bikher deta hai

wahi charagh-e-adawat magar dilon mein jala

ye aur baat abhi raushni nahin phaili

koi diya to magar gham ki zulmaton mein jala

wo kaun hain jinhen saya lagi firaq ki aanch

mera badan to hamesha rafaqaton mein jala

yahi nahin ki farozan thi intizar ki aag

charagh-e-dard bhi barsat ki ruton mein jala

na-jaane kha gai kis ki nazar bahaaron ko

ye ek shahr-e-mohabbat tha nafraton mein jala

wafa ki aag mein kundan bana to hairat kya

'siraj' waise bhi ahbab ke dukhon mein jala