dil bana hai hadaf-e-tir-e-nazar aap hi aap

dil banā hai hadaf-e-tīr-e-nazar aap hī aap

zaḳhm khaa.e haiñ shab-o-roz magar aap hī aap

ḳhauf-e-rahzan bhī nahīñ hājat-e-rahbar bhī nahīñ

rahguzar hai ḳhizar-e-rāhguzar aap hī aap

kuchh udhar se bhī taqāzā-e-vafā hone de

dil-e-nādāñ tū hī āġhāz na kar aap hī aap

ham ne maanā ki nazar ham na kareñge hargiz

aur khīñche koī dāman ko agar aap hī aap

laakh pardoñ meñ koī ḳhud ko chhupā.e bhī to kyā

jazb kar legī nazāroñ ko nazar aap hī aap

fikr-e-sāmān-e-takalluf ho 'asar' kyuuñ be-kār

ziist ho jā.egī aise hī basar aap hī aap

dil bana hai hadaf-e-tir-e-nazar aap hi aap

zaKHm khae hain shab-o-roz magar aap hi aap

KHauf-e-rahzan bhi nahin hajat-e-rahbar bhi nahin

rahguzar hai KHizar-e-rahguzar aap hi aap

kuchh udhar se bhi taqaza-e-wafa hone de

dil-e-nadan tu hi aaghaz na kar aap hi aap

hum ne mana ki nazar hum na karenge hargiz

aur khinche koi daman ko agar aap hi aap

lakh pardon mein koi KHud ko chhupae bhi to kya

jazb kar legi nazaron ko nazar aap hi aap

fikr-e-saman-e-takalluf ho 'asar' kyun be-kar

zist ho jaegi aise hi basar aap hi aap