dil bhi hassas hon aur jin ke kushada hon dimagh

dil bhī hassās hoñ aur jin ke kushāda hoñ dimāġh

sirf paate haiñ vahī asl meñ manzil kā surāġh

ujle kapḌoñ se faqat bantī nahīñ shaḳhsiyyat

kab musāvāt kā hāmil huā shāhīn se zaaġh

ziist kī raah meñ fursat kī tavaqqo' hai 'abas

marg se pahle yahāñ kis ko mayassar hai farāġh

apnī qudrat ke muāfiq hai yahāñ sab kā 'amal

haisiyat sab kī hai sūraj ho ki adnā sā charāġh

kyoñ tamanna ho use aur kisī jaam kī phir

rū-barū jis ke hoñ har dam tirī āñkhoñ ke ayāġh

jis kī manzil pe nazar rahtī hai 'hasrat' us ke

kab qadam rukte haiñ phir raah meñ sahrā hoñ ki baaġh

dil bhi hassas hon aur jin ke kushada hon dimagh

sirf pate hain wahi asl mein manzil ka suragh

ujle kapDon se faqat banti nahin shaKHsiyyat

kab musawat ka hamil hua shahin se zagh

zist ki rah mein fursat ki tawaqqo' hai 'abas

marg se pahle yahan kis ko mayassar hai faragh

apni qudrat ke muafiq hai yahan sab ka 'amal

haisiyat sab ki hai suraj ho ki adna sa charagh

kyon tamanna ho use aur kisi jam ki phir

ru-baru jis ke hon har dam teri aankhon ke ayagh

jis ki manzil pe nazar rahti hai 'hasrat' us ke

kab qadam rukte hain phir rah mein sahra hon ki bagh