dil-e-ashiq mein dagh hai kis ka

dil-e-āshiq meñ daaġh hai kis kā

ka.abe meñ ye charāġh hai kis kā

dil paḌā daaġh baaġh hai kis kā

chashm-e-pur-ḳhūñ ayāġh hai kis kā

maiñ ne maanā ki vo nahīñ be-mehr

āsmāñ par dimāġh hai kis kā

kūcha-e-ġhair se tumheñ kyā kaam

kaun thā ye surāġh hai kis kā

kar ke chaurang mujh ko naaz se vo

kahte haiñ chaar baaġh hai kis kā

us but-e-bad-dimāġh kā hai jahāñ

vo but-e-bad-dimāġh hai kis kā

dāġh-e-dil jal rahā hai be-roġhan

ye tilismī charāġh hai kis kā

saañp sūñghe jo sūñgh le zulfeñ

kis kī tāqat dimāġh hai kis kā

soz-e-hijrāñ se daaġh daaġh hai kaun

aaj dil bāġh-bāġh hai kis kā

kis kā banda banā hai ai vaa.iz

tere māthe pe daaġh hai kis kā

sher-e-'rāsiḳh' vo sun ke kahte haiñ

dil ye kis kā dimāġh hai kis kā

dil-e-ashiq mein dagh hai kis ka

kabe mein ye charagh hai kis ka

dil paDa dagh bagh hai kis ka

chashm-e-pur-KHun ayagh hai kis ka

main ne mana ki wo nahin be-mehr

aasman par dimagh hai kis ka

kucha-e-ghair se tumhein kya kaam

kaun tha ye suragh hai kis ka

kar ke chaurang mujh ko naz se wo

kahte hain chaar bagh hai kis ka

us but-e-bad-dimagh ka hai jahan

wo but-e-bad-dimagh hai kis ka

dagh-e-dil jal raha hai be-roghan

ye tilismi charagh hai kis ka

sanp sunghe jo sungh le zulfen

kis ki taqat dimagh hai kis ka

soz-e-hijran se dagh dagh hai kaun

aaj dil bagh-bagh hai kis ka

kis ka banda bana hai ai waiz

tere mathe pe dagh hai kis ka

sher-e-'rasiKH' wo sun ke kahte hain

dil ye kis ka dimagh hai kis ka