dil-e-bad-guman ke tawahhumat ajib hain

dil-e-bad-gumāñ ke tavahhumāt ajiib haiñ

mire naam ke ye hurūf saat ajiib haiñ

na taḳhaiyyulāt giraft-e-harf meñ aa sake

ye nuzūl-e-sher kī mushkilāt ajiib haiñ

tū talāsh kar koī aur ilāj-e-dil-e-hazīñ

ki davā-e-ishq ke muzmirāt ajiib haiñ

tire fikr ke bhī haiñ zāviye sabhī munfarid

tirī guftugū kī sabhī jihāt ajiib haiñ

ik anokhe dard ke paḌ rahe haiñ bhañvar yahāñ

abhī bahr-e-ġham meñ tamavvujāt ajiib haiñ

na faqīh koī samajh sakā na hī to sanam

ki ḳhudā se mere muāmalāt ajiib haiñ

sabhī manzaroñ ko ye dam-ba-ḳhud haiñ kiye hue

ye tirī nazar ke tahayyurāt ajiib haiñ

tirī tishnagī isī dast-e-zād kī muntazir

dil-e-ḳhush-gumāñ tirī ḳhvāhishāt ajiib haiñ

dil-e-bad-guman ke tawahhumat ajib hain

mere nam ke ye huruf sat ajib hain

na taKHaiyyulat giraft-e-harf mein aa sake

ye nuzul-e-sher ki mushkilat ajib hain

tu talash kar koi aur ilaj-e-dil-e-hazin

ki dawa-e-ishq ke muzmiraat ajib hain

tere fikr ke bhi hain zawiye sabhi munfarid

teri guftugu ki sabhi jihat ajib hain

ek anokhe dard ke paD rahe hain bhanwar yahan

abhi bahr-e-gham mein tamawwujat ajib hain

na faqih koi samajh saka na hi to sanam

ki KHuda se mere muamalat ajib hain

sabhi manzaron ko ye dam-ba-KHud hain kiye hue

ye teri nazar ke tahayyuraat ajib hain

teri tishnagi isi dast-e-zad ki muntazir

dil-e-KHush-guman teri KHwahishat ajib hain