dil-e-bashar hai ajab do-ruKHi se wabasta

dil-e-bashar hai 'ajab do-ruḳhī se vābasta

kisī ke saa.e se nafrat kisī se vābasta

maiñ saaya huuñ mujhe tārīkiyoñ se kyā lenā

mirī hayāt to hai raushnī se vābasta

mirā vajūd hai jaise kaTī patang koī

na mujh se koī na maiñ huuñ kisī se vābasta

charāġh-e-zaḳhm pe yaaro nazar jamā.e raho

har ik sahar hai isī raushnī se vābasta

maiñ ab tulū’-e-sahar se bhī kaañp uThtā huuñ

ye raushnī bhī na ho tīrgī se vābasta

jarāhateñ hoñ mire jism kī ki ruuh kā karb

har ik ‘azāb hai ehsās hī se vābasta

maiñ apnī soch ke dhāre pe bahtā rahtā huuñ

ye naav rahtī hai har dam nadī se vābasta

dil-e-bashar hai 'ajab do-ruKHi se wabasta

kisi ke sae se nafrat kisi se wabasta

main saya hun mujhe tarikiyon se kya lena

meri hayat to hai raushni se wabasta

mera wajud hai jaise kaTi patang koi

na mujh se koi na main hun kisi se wabasta

charagh-e-zaKHm pe yaro nazar jamae raho

har ek sahar hai isi raushni se wabasta

main ab tulu’-e-sahar se bhi kanp uThta hun

ye raushni bhi na ho tirgi se wabasta

jarahaten hon mere jism ki ki ruh ka karb

har ek ‘azab hai ehsas hi se wabasta

main apni soch ke dhaare pe bahta rahta hun

ye naw rahti hai har dam nadi se wabasta