dil-e-muKHlis kahe bin baat dil ki jaan jata hai

dil-e-muḳhlis kahe bin baat dil kī jaan jaatā hai

salīqe se manā.eñ gar to rūThā maan jaatā hai

ye ḳhāmoshī na jaane aur kitne rañg badlegī

ġhulū ko duur se hī aadmī pahchān jaatā hai

bhale kitnā hī pyārā kyoñ na ho jaañ se judā ho kar

turābī jism vāpas be-sar-o-sāmān jaatā hai

baḌī mashġhūl rahtī soch hai bismil mirī aksar

havā lagtī hai to zaḳhmoñ kī jānib dhyān jaatā hai

mohabbat ham ne kī hai tujh se jānāñ aan par aa kar

tirā yuuñ chhoḌ kar jaanā ḳhilāf-e-shān jaatā hai

bulā kar dekh lo tum bhī kabhī 'abrār' fursat meñ

baḌī mushkil se ghar aayā huā mehmān jaatā hai

dil-e-muKHlis kahe bin baat dil ki jaan jata hai

saliqe se manaen gar to ruTha man jata hai

ye KHamoshi na jaane aur kitne rang badlegi

ghulu ko dur se hi aadmi pahchan jata hai

bhale kitna hi pyara kyon na ho jaan se juda ho kar

turabi jism wapas be-sar-o-saman jata hai

baDi mashghul rahti soch hai bismil meri aksar

hawa lagti hai to zaKHmon ki jaanib dhyan jata hai

mohabbat hum ne ki hai tujh se jaanan aan par aa kar

tera yun chhoD kar jaana KHilaf-e-shan jata hai

bula kar dekh lo tum bhi kabhi 'abrar' fursat mein

baDi mushkil se ghar aaya hua mehman jata hai