dil-e-pur-KHun ko yaadon se ulajhta chhoD dete hain

dil-e-pur-ḳhūñ ko yādoñ se ulajhtā chhoḌ dete haiñ

ham is vahshī ko jañgal meñ akelā chhoḌ dete haiñ

na jaane kab koī bhīge hue manzar meñ aa nikle

dayār-e-ashk meñ palkeñ jhapaknā chhoḌ dete haiñ

use bhī dekhnā hai apnā me.ār-e-pazīrā.ī

chalā aa.e to kyā kahnā taqāzā chhoḌ dete haiñ

ġhamoñ kī bhiiḌ jab bhī qarya-e-jāñ kī taraf aa.e

bilakte ḳhvāb ḳhāmoshī se rasta chhoḌ dete haiñ

kisī kī yaad se dil ko munavvar tak nahīñ karnā

isī kā naam duniyā hai to duniyā chhoḌ dete haiñ

hameñ ḳhushbū kī sūrat dasht-e-hastī se guzarnā thā

achānak yuuñ huā lekin ye qissa chhoḌ dete haiñ

zarā se ashk meñ chhup kar un āñkhoñ meñ nahīñ rahnā

chalo 'aslam' hamī kū-e-tamannā chhoḌ dete haiñ

dil-e-pur-KHun ko yaadon se ulajhta chhoD dete hain

hum is wahshi ko jangal mein akela chhoD dete hain

na jaane kab koi bhige hue manzar mein aa nikle

dayar-e-ashk mein palken jhapakna chhoD dete hain

use bhi dekhna hai apna mear-e-pazirai

chala aae to kya kahna taqaza chhoD dete hain

ghamon ki bhiD jab bhi qarya-e-jaan ki taraf aae

bilakte KHwab KHamoshi se rasta chhoD dete hain

kisi ki yaad se dil ko munawwar tak nahin karna

isi ka nam duniya hai to duniya chhoD dete hain

hamein KHushbu ki surat dasht-e-hasti se guzarna tha

achanak yun hua lekin ye qissa chhoD dete hain

zara se ashk mein chhup kar un aankhon mein nahin rahna

chalo 'aslam' hami ku-e-tamanna chhoD dete hain