dil-e-shaida ki haqiqat mere maula kya hai

dil-e-shaidā kī haqīqat mire maulā kyā hai

jaan hāzir hai mirī aap se achchhā kyā hai

ahmad aur ahmad-e-be-mīm kā pardā kyā hai

aql-e-avval ko bhī hairat hai muammā kyā hai

aap ke ġham ne tan-e-zār meñ chhoḌā kyā hai

malak-ul-maut kā ye mujh se taqāzā kyā hai

aish-e-imroz pe ḳhush haiñ ġham-e-fardā kyā hai

maut aa jaa.e to mar jā.eñge jhagḌā kyā hai

ham to mad.hosh paḌe rahte the mai-ḳhāne meñ

kyā ḳhabar kātib-e-āmāl ne likkhā kyā hai

aaj tak shahr-e-ḳhamoshāñ kā na kuchh haal khulā

log kyā dekhne jaate haiñ tamāshā kyā hai

arsa-e-hashr meñ hai aaj qayāmat kī giraft

ab batā.e to koī nāzish-e-taqvā kyā hai

sar to ham bhī na jhukā.eñge subuk-sar ho kar

charḳh dushman hai to dushman sahī hotā kyā hai

tum se haT kar kahīñ paḌtī hī nahīñ merī nazar

tum tamannā ho mirī aur tamannā kyā hai

dū-badū kyuuñ na kahūñ tum se jo kahnā hai mujhe

dil meñ ghuT ghuT ke jo rah jaa.e vo shikvā kyā hai

gul ke dāman pe kahīñ ḳhuun kā dhabba na lage

tarz-e-fariyād ye ai bulbul-e-shaidā kyā hai

mushkileñ saiñkaḌoñ har gaam pe pesh aatī haiñ

DhūñDne vāloñ ne tujh ko abhī paayā kyā hai

kyā batā.ūñ dil-e-ranjūr kī hālat tum ko

vo to har roz kā bīmār hai achchhā kyā hai

kalima paḌhtā huā qabr meñ utrā huuñ maiñ

mere maz.hab ko nakīrain ne samjhā kyā hai

ik na ik fikr lagī rahtī hai har dam mujh ko

fikr-e-duniyā meñ paḌā huuñ ġham-e-uqbā kyā hai

bāda-noshoñ ke duā karte hī bādal umDe

aql hairān hai zāhid kī ye hotā kyā hai

shab-e-me.arāj kī kyā shaan hai allāh allāh

aaj dekhe to koī arsh-e-muallā kyā hai

ab ke bhī rauza-e-aqdas pe rasā.ī na huī

aur phir shūmī-e-taqdīr kā ronā kyā hai

ai falak ham tujhe zālim nahīñ kahte lekin

ġhaur se sun ki sadā-e-lab-e-duniyā kyā hai

ġham-e-ulfat kī tavāzo.a kī jigar hai maujūd

aur maqdūr merā is se ziyāda kyā hai

murde jī uThte haiñ jab naam tirā sunte haiñ

ham se pūchhe koī ejāz-e-masīhā kyā hai

maslahat ye hai ki iz.hār-e-mohabbat na karūñ

maut hai mere liye arz-e-tamannā kyā hai

dil-e-raushan ko samajh ka.aba-nashīñ kī manzil

dair kahte haiñ kise aur kalīsā kyā hai

kabhī botal ko uThātā hai kabhī sāġhar ko

nahīñ mālūm ki 'rāsiḳh' kā irāda kyā hai

dil-e-shaida ki haqiqat mere maula kya hai

jaan hazir hai meri aap se achchha kya hai

ahmad aur ahmad-e-be-mim ka parda kya hai

aql-e-awwal ko bhi hairat hai muamma kya hai

aap ke gham ne tan-e-zar mein chhoDa kya hai

malak-ul-maut ka ye mujh se taqaza kya hai

aish-e-imroz pe KHush hain gham-e-farda kya hai

maut aa jae to mar jaenge jhagDa kya hai

hum to madhosh paDe rahte the mai-KHane mein

kya KHabar katib-e-amal ne likkha kya hai

aaj tak shahr-e-KHamoshan ka na kuchh haal khula

log kya dekhne jate hain tamasha kya hai

arsa-e-hashr mein hai aaj qayamat ki giraft

ab batae to koi nazish-e-taqwa kya hai

sar to hum bhi na jhukaenge subuk-sar ho kar

charKH dushman hai to dushman sahi hota kya hai

tum se haT kar kahin paDti hi nahin meri nazar

tum tamanna ho meri aur tamanna kya hai

du-badu kyun na kahun tum se jo kahna hai mujhe

dil mein ghuT ghuT ke jo rah jae wo shikwa kya hai

gul ke daman pe kahin KHun ka dhabba na lage

tarz-e-fariyaad ye ai bulbul-e-shaida kya hai

mushkilen sainkaDon har gam pe pesh aati hain

DhunDne walon ne tujh ko abhi paya kya hai

kya bataun dil-e-ranjur ki haalat tum ko

wo to har roz ka bimar hai achchha kya hai

kalima paDhta hua qabr mein utra hun main

mere mazhab ko nakirain ne samjha kya hai

ek na ek fikr lagi rahti hai har dam mujh ko

fikr-e-duniya mein paDa hun gham-e-uqba kya hai

baada-noshon ke dua karte hi baadal umDe

aql hairan hai zahid ki ye hota kya hai

shab-e-mearaj ki kya shan hai allah allah

aaj dekhe to koi arsh-e-mualla kya hai

ab ke bhi rauza-e-aqdas pe rasai na hui

aur phir shumi-e-taqdir ka rona kya hai

ai falak hum tujhe zalim nahin kahte lekin

ghaur se sun ki sada-e-lab-e-duniya kya hai

gham-e-ulfat ki tawazoa ki jigar hai maujud

aur maqdur mera is se ziyaada kya hai

murde ji uThte hain jab nam tera sunte hain

hum se puchhe koi ejaz-e-masiha kya hai

maslahat ye hai ki izhaar-e-mohabbat na karun

maut hai mere liye arz-e-tamanna kya hai

dil-e-raushan ko samajh kaba-nashin ki manzil

dair kahte hain kise aur kalisa kya hai

kabhi botal ko uThata hai kabhi saghar ko

nahin malum ki 'rasiKH' ka irada kya hai