dil-e-shikasta harif-e-shabab ho na saka

dil-e-shikasta harīf-e-shabāb ho na sakā

ye jām-e-zarf navāz-e-sharāb ho na sakā

kuchh aise rahm ke qābil the ibtidā hī se ham

ki un se bhī sitam-e-be-hisāb ho na sakā

nazar na aayā kabhī shab ko un kā jalva-e-ruḳh

ye āftāb kabhī māhtāb ho na sakā

nigāh-e-faiz se mahrūm bartarī ma.alūm

sitāra chamkā magar āftāb ho na sakā

hai jaam ḳhālī to phīkī hai chāñdnī kaisī

ye sail-e-nūr sitam hai sharāb ho na sakā

ye mai chhalak ke bhī us husn ko pahuñch na sakī

ye phuul ghul ke bhī us kā shabāb ho na sakā

kisī kī shoḳh-navā.ī kā hosh thā kis ko

maiñ nā-tavāñ to harīf-e-ḳhitāb ho na sakā

huuñ tere vasl se māyūs is qadar goyā

kabhī jahāñ meñ koī kāmyāb ho na sakā

vo pūchhte haiñ tire dil kī aarzū kyā hai

ye ḳhvāb haa.e kabhī merā ḳhvāb ho na sakā

talāsh-e-ma.anī-e-hastī meñ falsafa na ḳhirad

ye raaz aaj talak be-hijāb ho na sakā

sharāb-e-ishq meñ aisī kashish sī thī 'aḳhtar'

ki laakh zabt kiyā ijtināb ho na sakā

dil-e-shikasta harif-e-shabab ho na saka

ye jam-e-zarf nawaz-e-sharab ho na saka

kuchh aise rahm ke qabil the ibtida hi se hum

ki un se bhi sitam-e-be-hisab ho na saka

nazar na aaya kabhi shab ko un ka jalwa-e-ruKH

ye aaftab kabhi mahtab ho na saka

nigah-e-faiz se mahrum bartari malum

sitara chamka magar aaftab ho na saka

hai jam KHali to phiki hai chandni kaisi

ye sail-e-nur sitam hai sharab ho na saka

ye mai chhalak ke bhi us husn ko pahunch na saki

ye phul ghul ke bhi us ka shabab ho na saka

kisi ki shoKH-nawai ka hosh tha kis ko

main na-tawan to harif-e-KHitab ho na saka

hun tere wasl se mayus is qadar goya

kabhi jahan mein koi kaamyab ho na saka

wo puchhte hain tere dil ki aarzu kya hai

ye KHwab hae kabhi mera KHwab ho na saka

talash-e-mani-e-hasti mein falsafa na KHirad

ye raaz aaj talak be-hijab ho na saka

sharab-e-ishq mein aisi kashish si thi 'aKHtar'

ki lakh zabt kiya ijtinab ho na saka