dil-e-tabah bhi hai aalam-e-KHarab bhi hai

dil-e-tabāh bhī hai ālam-e-ḳharāb bhī hai

nigāh-e-dost yahī vaqt-e-inqalāb bhī hai

do-ātisha sar-e-ruḳhsār ho ga.e aañsū

guloñ pe qatra-e-shabnam nahīñ sharāb bhī hai

nigāh-e-shauq larazte haiñ taar chilman ke

talāsh kar inhī kirnoñ meñ āftāb bhī hai

kahāñ se dekhiye mauj-e-surūr uThtī hai

nigāh-e-nāz bhī hai sāġhar-e-sharāb bhī hai

ḳhilāf-e-ahl-e-safīna hī nāḳhudā se nahīñ

jabīn-e-bahr pe larzāñ ḳhat-e-itāb bhī hai

havā-e-dahr ne phir dāmanoñ pe Daal diyā

vo gard jis meñ nihāñ bū-e-inqalāb bhī hai

ai jastgān-e-rah-e-ġham chale chalo aage

koī maqām ba-nām-e-bahisht-e-ḳhvāb bhī hai

yahī vo 'mānī' hai salmā-e-gonDvāna tirā

jo faiz-e-ruḳh se tire sāhib-e-kitāb bhī hai

dil-e-tabah bhi hai aalam-e-KHarab bhi hai

nigah-e-dost yahi waqt-e-inqalab bhi hai

do-atisha sar-e-ruKHsar ho gae aansu

gulon pe qatra-e-shabnam nahin sharab bhi hai

nigah-e-shauq larazte hain tar chilman ke

talash kar inhi kirnon mein aaftab bhi hai

kahan se dekhiye mauj-e-surur uThti hai

nigah-e-naz bhi hai saghar-e-sharab bhi hai

KHilaf-e-ahl-e-safina hi naKHuda se nahin

jabin-e-bahr pe larzan KHat-e-itab bhi hai

hawa-e-dahr ne phir damanon pe Dal diya

wo gard jis mein nihan bu-e-inqalab bhi hai

ai jastgan-e-rah-e-gham chale chalo aage

koi maqam ba-nam-e-bahisht-e-KHwab bhi hai

yahi wo 'mani' hai salma-e-gonDwana tera

jo faiz-e-ruKH se tere sahib-e-kitab bhi hai