dil hai ada-shanas nazar pairahan-shanas

dil hai adā-shanās nazar pairahan-shanās

kah duuñ maiñ rāz-e-dil vo agar hoñ suḳhan-shanās

muzhda haiñ fasl-e-gul kā tirī āh-o-zāriyāñ

ai tā.ir-e-asīr bahār-e-chaman-shanās

dāmān-e-dil darīda sahī ai bahār-e-husn

ham haiñ jahān-e-‘ishq meñ gul-pairahan-shanās

nā-vāqif-e-adā to nahīñ ai qabā-e-vaqt

ham bā-shu’ūr log shikan-dar-shikan-shanās

kaisā hayā kā rang vahāñ pās-e-vaz’ kyoñ

ḳhalvat bhī ho ga.ī ho jahāñ anjuman-shanās

lā.eñgī jū-e-shīr faqat tesha-kāmiyāñ

ho jā.egā mizāj agar kohkan-shanās

'abrār' 'ilm-e-she'r-o-suḳhan kī talab rahe

har chand ḳhāl-ḳhāl haiñ ab fikr-o-fan-shanās

dil hai ada-shanas nazar pairahan-shanas

kah dun main raaz-e-dil wo agar hon suKHan-shanas

muzhda hain fasl-e-gul ka teri aah-o-zariyan

ai tair-e-asir bahaar-e-chaman-shanas

daman-e-dil darida sahi ai bahaar-e-husn

hum hain jahan-e-‘ishq mein gul-pairahan-shanas

na-waqif-e-ada to nahin ai qaba-e-waqt

hum ba-shu’ur log shikan-dar-shikan-shanas

kaisa haya ka rang wahan pas-e-waz’ kyon

KHalwat bhi ho gai ho jahan anjuman-shanas

laengi ju-e-shir faqat tesha-kaamiyan

ho jaega mizaj agar kohkan-shanas

'abrar' 'ilm-e-she'r-o-suKHan ki talab rahe

har chand KHal-KHal hain ab fikr-o-fan-shanas