dil hamari taraf se saf karo

dil hamārī taraf se saaf karo

jo huā vo huā muaaf karo

ahl-e-gulshan bahār aa pahuñchī

ḳhār-o-ḳhas se chaman ko saaf karo

jab sitam hogā phir karam ke ba.ad

to karam se mujhe muaaf karo

mujh se kahtī hai us kī shān-e-karam

tum gunāhoñ kā e'tirāf karo

ye bhī aadat meñ koī aadat hai

jo kaho us ke bar-ḳhilāf karo

kyuuñ bujhāo paheliyāñ be-kār

guftugū mujh se saaf saaf karo

ek do tiin chaar pāñch nahīñ

sab ḳhatā.eñ mirī muaaf karo

husn un ko ye raa.e detā hai

kaam ummīd ke ḳhilāf karo

hazrat-e-dil yahī hai dair-o-haram

mahfil-e-yār kā tavāf karo

tum sazā do magar ba-hasb-e-qusūr

maiñ ye kahtā nahīñ muaaf karo

is meñ bhī shaan paa.ī jaatī hai

ho koī baat inhirāf karo

saḳht-jānoñ kā qatl khel nahīñ

kuchh dinoñ aur haath saaf karo

tum ko qahr-e-karam-numā kī qasam

faisla mere bar-ḳhilāf karo

khulte haiñ dil ke itne hī jauhar

jitnā is aa.ine ko saaf karo

dil meñ haiñ ḳhār-e-ārzū lākhoñ

aao kāñToñ se ghar ko saaf karo

tūr-e-sīnā kī samt jaa.eñ kalīm

'nūh' tum sair-e-koh-e-qāf karo

dil hamari taraf se saf karo

jo hua wo hua muaf karo

ahl-e-gulshan bahaar aa pahunchi

KHar-o-KHas se chaman ko saf karo

jab sitam hoga phir karam ke baad

to karam se mujhe muaf karo

mujh se kahti hai us ki shan-e-karam

tum gunahon ka e'tiraf karo

ye bhi aadat mein koi aadat hai

jo kaho us ke bar-KHilaf karo

kyun bujhao paheliyan be-kar

guftugu mujh se saf saf karo

ek do tin chaar panch nahin

sab KHataen meri muaf karo

husn un ko ye rae deta hai

kaam ummid ke KHilaf karo

hazrat-e-dil yahi hai dair-o-haram

mahfil-e-yar ka tawaf karo

tum saza do magar ba-hasb-e-qusur

main ye kahta nahin muaf karo

is mein bhi shan pai jati hai

ho koi baat inhiraf karo

saKHt-jaanon ka qatl khel nahin

kuchh dinon aur hath saf karo

tum ko qahr-e-karam-numa ki qasam

faisla mere bar-KHilaf karo

khulte hain dil ke itne hi jauhar

jitna is aaine ko saf karo

dil mein hain KHar-e-arzu lakhon

aao kanTon se ghar ko saf karo

tur-e-sina ki samt jaen kalim

'nuh' tum sair-e-koh-e-qaf karo